ನವದೆಹಲಿ : 2026ರ ಮಹಿಳಾ ಟಿ20 ವಿಶ್ವಕಪ್ಗಾಗಿ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಂಡಳಿಯು ತನ್ನ ಬಲಿಷ್ಠ ತಂಡವನ್ನು ಘೋಷಿಸಿದೆ. ಈ ಆಯ್ಕೆಯಲ್ಲಿ ಅತ್ಯಂತ ಆಶ್ಚರ್ಯಕರ ವಿಷಯವೆಂದರೆ, 2023 ರಲ್ಲಿ ನಿವೃತ್ತಿ ಹೊಂದಿದ್ದ 37 ವರ್ಷದ ವೇಗದ ಬೌಲರ್ ಶಬ್ನಿಮ್ ಇಸ್ಮಾಯಿಲ್ ಮತ್ತೆ ತಂಡಕ್ಕೆ ಮರಳಿದ್ದಾರೆ.
ತಂಡವನ್ನು ಲಾರಾ ವೊಲ್ವಾರ್ಡ್ ಮುನ್ನಡೆಸಲಿದ್ದಾರೆ. 113 ಟಿ20 ಪಂದ್ಯಗಳಲ್ಲಿ 123 ವಿಕೆಟ್ ಪಡೆದಿರುವ ಇಸ್ಮಾಯಿಲ್, ಹಳೆಯ ಜೋಡಿ ಮರಿಜಾನ್ ಕಾಪ್ ಅವರೊಂದಿಗೆ ಹೊಸ ಚೆಂಡನ್ನು ಹಂಚಿಕೊಳ್ಳಲಿದ್ದಾರೆ.
ಅನಾರೋಗ್ಯದಿಂದ ಚೇತರಿಸಿಕೊಂಡಿರುವ ಮರಿಜಾನ್ ಕಾಪ್ ಮತ್ತು ನಿವೃತ್ತಿಯಿಂದ ಹೊರಬಂದು ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡುತ್ತಿರುವ ಮಾಜಿ ನಾಯಕಿ ಡೇನ್ ವ್ಯಾನ್ ನೀಕರ್ಕ್ ತಂಡದಲ್ಲಿದ್ದಾರೆ.
ಸ್ಫೋಟಕ ಫಿನಿಶರ್ ಕೈಲಾ ರೇನೆಕೆ ಮತ್ತು ವಿಕೆಟ್ ಕೀಪರ್ ಕರಾಬೊ ಮೆಸೊ ಮೊದಲ ಬಾರಿಗೆ ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.
ಕಳೆದ ವಿಶ್ವಕಪ್ನಲ್ಲಿ ತಂಡವನ್ನು ಫೈನಲ್ಗೆ ಕೊಂಡೊಯ್ಯಲು ಪ್ರಮುಖ ಪಾತ್ರ ವಹಿಸಿದ್ದ ಆನೆಕೆ ಬಾಷ್ ಈ ಬಾರಿ ತಂಡದಲ್ಲಿ ಸ್ಥಾನ ಪಡೆಯುವಲ್ಲಿ ವಿಫಲರಾಗಿದ್ದಾರೆ.
ಪಂದ್ಯಾವಳಿಯ ವಿವರ:
ವಿಶ್ವಕಪ್ ಜೂನ್ 12 ರಿಂದ ಜುಲೈ 5 ರವರೆಗೆ ಇಂಗ್ಲೆಂಡ್ನಲ್ಲಿ ನಡೆಯಲಿದೆ. ದಕ್ಷಿಣ ಆಫ್ರಿಕಾ ತಂಡವು ಗ್ರೂಪ್ 1 ರಲ್ಲಿದ್ದು, ಆಸ್ಟ್ರೇಲಿಯಾ, ಭಾರತ, ಬಾಂಗ್ಲಾದೇಶ, ನೆದರ್ಲ್ಯಾಂಡ್ಸ್ ಮತ್ತು ಪಾಕಿಸ್ತಾನ ತಂಡಗಳೊಂದಿಗೆ ಪೈಪೋಟಿ ನಡೆಸಲಿದೆ. ದಕ್ಷಿಣ ಆಫ್ರಿಕಾ ತನ್ನ ಮೊದಲ ಪಂದ್ಯವನ್ನು ಜೂನ್ 13 ರಂದು ಮ್ಯಾಂಚೆಸ್ಟರ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಆಡಲಿದೆ.
ದಕ್ಷಿಣ ಆಫ್ರಿಕಾ ತಂಡ ಹೀಗಿದೆ:
ಲಾರಾ ವೊಲ್ವಾರ್ಡ್ (ನಾಯಕಿ), ತಾಜ್ಮಿನ್ ಬ್ರಿಟ್ಸ್, ನಾಡಿನೆ ಡಿ ಕ್ಲರ್ಕ್, ಅನ್ನೆರಿ ಡೆರ್ಕ್ಸೆನ್, ಶಬ್ನಿಮ್ ಇಸ್ಮಾಯಿಲ್, ಸಿನಾಲೋ ಜಾಫ್ಟಾ (ವಿಕೆಟ್ ಕೀಪರ್), ಮರಿಜಾನ್ ಕಾಪ್, ಅಯಬೊಂಗಾ ಖಾಕಾ, ಸುನೆ ಲೂಸ್, ಕರಾಬೊ ಮೆಸೊ (ವಿಕೆಟ್ ಕೀಪರ್), ನಾನ್ಕುಲುಲೆಕೊ ಮ್ಲಾಬಾ, ಕೈಲಾ ರೇನೆಕೆ, ತುಮಿ ಸೆಖುಖುನೆ, ಕ್ಲೋಯ್ ಟ್ರಯಾನ್
ಮುಖ್ಯ ಕೋಚ್ ಮಂಡ್ಲಾ ಮಾಶಿಂಬಿ “ಶಬ್ನಿಮ್ ಅಂತಹ ಆಟಗಾರ್ತಿ ಮರಳಿರುವುದು ತಂಡಕ್ಕೆ ದೊಡ್ಡ ಬಲ. ದೇಶಕ್ಕಾಗಿ ಆಡುವ ಅವರ ಹಸಿವು ಇಂದಿಗೂ ಕಡಿಮೆಯಾಗಿಲ್ಲ. ಅನುಭವಿಗಳಾದ ಮರಿಜಾನ್ ಮತ್ತು ಡೇನ್ ಅವರ ಉಪಸ್ಥಿತಿ ತಂಡಕ್ಕೆ ಆನೆಬಲ ತಂದಿದೆ” ಎಂದಿದ್ದಾರೆ. (ಏಜೆನ್ಸಿಸ್)
