ಬೆಂಗಳೂರು: ಶೈಕ್ಷಣಿಕ ವರ್ಷ 2024–25ರಲ್ಲಿ ಪ್ರಥಮ ತರಗತಿಗೆ ಮಕ್ಕಳ ದಾಖಲಾತಿ ಪ್ರಕ್ರಿಯೆ ಆರಂಭವಾಗಿದ್ದು, ಈ ಬಾರಿ ಮಕ್ಕಳ ವಯೋಮಿತಿಯಲ್ಲಿ ರಾಜ್ಯ ಸರ್ಕಾರ ಸಡಿಲಿಕೆ ಮಾಡಿದೆ. ಇದೀಗ 5 ವರ್ಷ 5 ತಿಂಗಳು ತುಂಬಿದ ಮಕ್ಕಳು 1ನೇ ತರಗತಿಗೆ ಸೇರಿಕೊಳ್ಳಬಹುದು ಎಂಬುದಾಗಿ ಪ್ರಾಥಮಿಕ ಮತ್ತು ಪ್ರೌಢಶಿಕ್ಷಣ ಸಚಿವ ಮಧು ಬಂಗಾರಪ್ಪ ಹೇಳಿದ್ದಾರೆ.
ಈ ಕುರಿತು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮಧು ಬಂಗಾರಪ್ಪ, “ಈ ವರ್ಷ ಮಾತ್ರ ವಿಶೇಷವಾಗಿ ವಯೋಮಿತಿ ಸಡಿಲಿಸಲಾಗಿದೆ. ಮುಂದಿನ ಶೈಕ್ಷಣಿಕ ವರ್ಷದಿಂದ 6 ವರ್ಷ ತುಂಬಿದ ಮಕ್ಕಳಿಗೆ ಮಾತ್ರ ಪ್ರಥಮ ತರಗತಿಯ ಪ್ರವೇಶ ಲಭ್ಯವಾಗಲಿದೆ,” ಎಂದು ತಿಳಿಸಿದರು.
ಪೋಷಕರು ವಯೋಮಿತಿಯ ಗೊಂದಲದಲ್ಲಿರುವುದನ್ನು ಗಮನಿಸಿ, 2 ತಿಂಗಳು ರಿಯಾಯಿತಿ ನೀಡಲಾಗಿದೆ. ಎಸ್‌ಇಪಿ (School Education Policy) ವತಿಯಿಂದ ಮೊದಲಿಗೆ 6 ವರ್ಷ ಎಂಬ ಶಿಫಾರಸು ಬಂದಿತ್ತು. ಆದರೆ, ಇಲಾಖೆಯ ಮಾತುಕತೆ ನಂತರ 5 ವರ್ಷ 5 ತಿಂಗಳು ಹೊಂದಿದ್ದರೆ ದಾಖಲಾತಿಗೆ ಅನುಮತಿ ನೀಡಬೇಕೆಂದು ಸೂಚನೆ ನೀಡಲಾಗಿದೆ.
ಈ ತೀರ್ಮಾನವು ಕೇವಲ ರಾಜ್ಯ ಪಠ್ಯಕ್ರಮ (State Syllabus) ಅನುಸರಿಸುವ ಶಾಲೆಗಳಿಗಷ್ಟೆ ಅನ್ವಯವಾಗುತ್ತದೆ. ಸಿಬಿಎಸ್‌ಇ, ಐಸಿಎಸ್‌ಸಿ ಬೋರ್ಡ್‌ಗಳಿಗೆ ಇದು ಅನ್ವಯವಾಗದು ಎಂದು ಅವರು ಸ್ಪಷ್ಟಪಡಿಸಿದರು.
ಮಕ್ಕಳ ಶಿಕ್ಷಣದಲ್ಲಿ ಒತ್ತಡ ವಿರೋಧಿಸಿರುವ ಮಧು ಬಂಗಾರಪ್ಪ, “ಮಿಷನ್‌ ರೀತಿ ಓದಿಸುವ ಬಗ್ಗೆ ಪೋಷಕರು ಮುಗ್ಧ ನಿರ್ಧಾರಗಳನ್ನು ಕೈಗೊಳ್ಳಬಾರದು. ಮಕ್ಕಳಿಗೆ ಕಲಿಕೆ ಉತ್ತಮವಾಗಿ ಸಾಗಲು ಒತ್ತಡವಿಲ್ಲದ ವಾತಾವರಣ ಅವಶ್ಯಕ” ಎಂದು ಸಲಹೆ ನೀಡಿದರು.
ಈ ನಿರ್ಧಾರ ಪೋಷಕರಿಗೆ ತಾತ್ಕಾಲಿಕ ನೆಮ್ಮದಿ ನೀಡಿದರೂ, ಮುಂದಿನ ವರ್ಷದಿಂದ ಹೊಸ ನೀತಿ ಅನ್ವಯವಾಗಲಿದೆ ಎಂಬುದನ್ನು ಮರೆಯಬಾರದು.
