ಕ್ರೊಯೇಷಿಯಾ : ಗ್ರ್ಯಾಂಡ್ ಚೆಸ್ ಟೂರ್ 2026ರ ಮೂರನೇ ಹಂತದ ಪಂದ್ಯಾವಳಿಯಾದ ‘ಸೂಪರ್ ರಾಪಿಡ್ ಮತ್ತು ಬ್ಲಿಟ್ಜ್ ಕ್ರೊಯೇಷಿಯಾ’ ಟೂರ್ನಿಯಲ್ಲಿ ಭಾರತದ ಯುವ ಗ್ರ್ಯಾಂಡ್ ಮಾಸ್ಟರ್ಗಳು ಗಮನಾರ್ಹ ಪ್ರದರ್ಶನ ನೀಡುತ್ತಿದ್ದಾರೆ. ಮೊದಲ ದಿನದ ಆಟದ ಅಂತ್ಯಕ್ಕೆ ಆರ್. ಪ್ರಜ್ಞಾನಂದ ಅವರು ಜಂಟಿ ಎರಡನೇ ಸ್ಥಾನದಲ್ಲಿದ್ದರೆ, ವಿಶ್ವ ಚಾಂಪಿಯನ್ ಡಿ. ಗುಕೇಶ್ ಆರನೇ ಸ್ಥಾನದಲ್ಲಿದ್ದಾರೆ.
ಪ್ರಜ್ಞಾನಂದ ಅವರ ಭರ್ಜರಿ ಆರಂಭ
ಯುವ ಪ್ರತಿಭೆ ಆರ್. ಪ್ರಜ್ಞಾನಂದ ಅವರು ಮೊದಲ ದಿನ ಅತ್ಯುತ್ತಮ ಲಯದಲ್ಲಿದ್ದರು. ಆರಂಭಿಕ ಪಂದ್ಯದಲ್ಲಿ ಜರ್ಮನಿಯ ವಿನ್ಸೆಂಟ್ ಕೀಮರ್ ಅವರನ್ನು ಮಣಿಸುವ ಮೂಲಕ ಶುಭಾರಂಭ ಮಾಡಿದರು. ನಂತರ ಫ್ರಾನ್ಸ್ನ ಮ್ಯಾಕ್ಸಿಮ್ ವಾಚಿಯರ್-ಲಾಗ್ರೇವ್ ವಿರುದ್ಧದ ಪಂದ್ಯವನ್ನು ಡ್ರಾ ಮಾಡಿಕೊಂಡರು. ದಿನದ ಕೊನೆಯ ಪಂದ್ಯದಲ್ಲಿ ಡಿ. ಗುಕೇಶ್ ವಿರುದ್ಧದ ಹೋರಾಟವು ಡ್ರಾನಲ್ಲಿ ಅಂತ್ಯಗೊಂಡಿತು. ಪ್ರಸ್ತುತ ಪ್ರಜ್ಞಾನಂದ 6 ಅಂಕಗಳಿಗೆ 4 ಅಂಕಗಳನ್ನು ಗಳಿಸಿ, ಜಂಟಿ ಎರಡನೇ ಸ್ಥಾನದಲ್ಲಿದ್ದಾರೆ.
ಗುಕೇಶ್ ಅವರ ಸಂಘರ್ಷ ಮತ್ತು ಚೇತರಿಕೆ
ವಿಶ್ವ ಚಾಂಪಿಯನ್ ಡಿ. ಗುಕೇಶ್ ಅವರಿಗೆ ಮೊದಲ ದಿನ ಮಿಶ್ರಫಲ ಲಭಿಸಿತು. ಮೊದಲ ಪಂದ್ಯದಲ್ಲಿ ಮ್ಯಾಕ್ಸಿಮ್ ವಾಚಿಯರ್-ಲಾಗ್ರೇವ್ ವಿರುದ್ಧ ಸೋಲನ್ನು ಅನುಭವಿಸಿದರೂ, ಎರಡನೇ ಸುತ್ತಿನಲ್ಲಿ ಇವಾನ್ ಸಾರಿಕ್ ಅವರನ್ನು ಸೋಲಿಸುವ ಮೂಲಕ ಭರ್ಜರಿ ಕಮ್ಬ್ಯಾಕ್ ಮಾಡಿದರು. ಮೂರನೇ ಸುತ್ತಿನಲ್ಲಿ ಪ್ರಜ್ಞಾನಂದ ವಿರುದ್ಧ ಡ್ರಾ ಸಾಧಿಸಿದರು. ಒಟ್ಟಾರೆಯಾಗಿ 3 ಅಂಕಗಳೊಂದಿಗೆ ಗುಕೇಶ್ ಸದ್ಯ ಆರನೇ ಸ್ಥಾನದಲ್ಲಿದ್ದಾರೆ. ರಾಪಿಡ್ ವಿಭಾಗದಲ್ಲಿ ಇನ್ನೂ ಆರು ಸುತ್ತುಗಳ ಆಟ ಬಾಕಿಯಿದ್ದು, ಗುಕೇಶ್ ಅಂಕಪಟ್ಟಿಯಲ್ಲಿ ಮೇಲೇರುವ ನಿರೀಕ್ಷೆಯಿದೆ.
ಅಗ್ರಸ್ಥಾನದಲ್ಲಿ ಅಲಿರೆಜಾ ಫಿರೋಜಾ
ಫ್ರಾನ್ಸ್ನ ಅಲಿರೆಜಾ ಫಿರೋಜಾ 5 ಅಂಕಗಳೊಂದಿಗೆ ಟೂರ್ನಿಯಲ್ಲಿ ಏಕೈಕ ಅಗ್ರಸ್ಥಾನ ಕಾಯ್ದುಕೊಂಡಿದ್ದಾರೆ. ಕೆಲವು ವಾರಗಳ ಹಿಂದೆ ಟೆನ್ನಿಸ್ ಗಾಯದ ಕಾರಣದಿಂದ ರೊಮೇನಿಯಾದಲ್ಲಿ ನಡೆದ ಟೂರ್ನಿಯನ್ನು ಅರ್ಧಕ್ಕೆ ತೊರೆದಿದ್ದ ಫಿರೋಜಾ, ಇದೀಗ ಭರ್ಜರಿ ಫಾರ್ಮ್ಗೆ ಮರಳಿದ್ದಾರೆ. ಮೂರನೇ ಸುತ್ತಿನಲ್ಲಿ ಅನೀಶ್ ಗಿರಿ ವಿರುದ್ಧ ಡ್ರಾ ಸಾಧಿಸುವ ಮೂಲಕ ಅವರು ತಮ್ಮ ಮುನ್ನಡೆಯನ್ನು ಉಳಿಸಿಕೊಂಡಿದ್ದಾರೆ.
ಈ ಟೂರ್ನಿಯು ಎರಡು ವಿಭಾಗಗಳಲ್ಲಿ ನಡೆಯುತ್ತಿದೆ. ಸೂಪರ್ ರಾಪಿಡ್: 9 ಸುತ್ತುಗಳ ಪಂದ್ಯ. ಸಮಯ: ಪ್ರತಿ ಆಟಗಾರರಿಗೆ 25 ನಿಮಿಷ + ಪ್ರತಿ ನಡೆಗೆ 10 ಸೆಕೆಂಡುಗಳ ಬೋನಸ್. (ಗೆಲುವಿಗೆ 2 ಅಂಕ, ಡ್ರಾಗೆ 1 ಅಂಕ).
ಬ್ಲಿಟ್ಜ್: 18 ಸುತ್ತುಗಳ ಪಂದ್ಯ. ಸಮಯ: ಪ್ರತಿ ಆಟಗಾರರಿಗೆ 5 ನಿಮಿಷ + ಪ್ರತಿ ನಡೆಗೆ 2 ಸೆಕೆಂಡುಗಳ ಬೋನಸ್. (ಗೆಲುವಿಗೆ 1 ಅಂಕ, ಡ್ರಾಗೆ 0.5 ಅಂಕ). (ಏಜೆನ್ಸಿಸ್)
