ನವದೆಹಲಿ: ಇಂದು ಪ್ರಧಾನಿ ನರೇಂದ್ರ ಮೋದಿ ಅವರು ದೇಶವನ್ನುದ್ದೇಶಿಸಿ ಭಾಷಣ ಮಾಡಿದ್ದು, ಪಾಕಿಸ್ತಾನದಲ್ಲಿ ಭಾರತೀಯ ಸೇನೆ ಯಶಸ್ವಿಯಾಗಿ ನಡೆಸಿದ ‘ಆಪರೇಷನ್ ಸಿಂಧೂರ’ವನ್ನು ದೇಶದ ಹೆಣ್ಣುಮಕ್ಕಳಿಗೆ ಸಮರ್ಪಿಸಿದ್ದಾರೆ. ಈ ಆಪರೇಷನ್ ಪಹಲ್ಗಾಮ್ ದಾಳಿಗೆ ಪ್ರತೀಕಾರವಾಗಿದ್ದು, ದಾಳಿ ಕ್ರೂರವಾಗಿ, ಕುಟುಂಬ ಸದಸ್ಯರ ಎದುರೇ ಪ್ರವಾಸಿಗರನ್ನು ಕೊಂದ ಘಟನೆ ರಾಷ್ಟ್ರದ ಮನಸ್ಸನ್ನು ನೊಂದಿಸಿತ್ತು.
ದೇಶವನ್ನು ಉದ್ದೇಶಿಸಿ ಮಾತನಾಡಿದ ಅವರು, “ಆಪರೇಷನ್ ಸಿಂಧೂರ ನೈತಿಕ ನ್ಯಾಯದ ಸಂಕೇತ. ಸಿಂಧೂರ ಅಳಿಸಿದ ಉಗ್ರರಿಗೆ ನಿಜವಾದ ಪಾಠ ಕಲಿಸಲಾಗಿದೆ. ಸೇನಾಪಡೆಗಳು ಉಗ್ರರ ಶಿಬಿರಗಳ ಮೇಲೆ ನಿಖರ ದಾಳಿ ನಡೆಸಿ ಭಯೋತ್ಪಾದನೆಗೆ ತಕ್ಕ ಪ್ರತಿಕ್ರಿಯೆ ನೀಡಿದ್ದಾರೆ.” ಅವರು ಸೇನಾಪಡೆ, ವಿಜ್ಞಾನಿಗಳು ಹಾಗೂ ಗುಪ್ತಚರ ಅಧಿಕಾರಿಗಳಿಗೆ ಅಭಿನಂದನೆ ಸಲ್ಲಿಸಿದರು.
ಮೇ 6ರ ರಾತ್ರಿ ಮತ್ತು ಮೇ 7ರ ಬೆಳಗ್ಗೆ ನಡೆದ ಈ ಕಾರ್ಯಚರಣೆ ಭಾರತದ ಶೌರ್ಯ ಮತ್ತು ತೀರ್ಮಾನಶಕ್ತಿಯ ಸಂಕೇತವಾಗಿದೆ. ಮೋದಿಯವರ ಪ್ರಕಾರ, “ಪಾಕಿಸ್ತಾನಕ್ಕೂ ಈ ಮಟ್ಟದ ನಿರ್ಧಾರ ಭಾರತ ತೆಗೆದುಕೊಳ್ಳುತ್ತದೆ ಎಂಬ ಭಾವನೆ ಇರಲಿಲ್ಲ.”
ಏಪ್ರಿಲ್ 22ರಂದು ಪಹಲ್ಗಾಮ್‌ನಲ್ಲಿ ಉಗ್ರರು ನಡೆಸಿದ ದಾಳಿಯಲ್ಲಿ 26 ಪ್ರವಾಸಿಗರು ಸಾವನ್ನಪ್ಪಿದ್ದರು. ಈ ಕ್ರೂರತೆಗೆ ಪ್ರತೀಕಾರವಾಗಿ ನಡೆಸಲಾದ ಆಪರೇಷನ್ ಸಿಂಧೂರ ಯಶಸ್ವಿಯಾಗಿ ಉಗ್ರರ ನೆಲೆಗಳನ್ನು ನಾಶಮಾಡಿದೆ. “ಮಹಿಳೆಯರ ಸಿಂಧೂರ ಅಳಿಸಿದರೆ ಏನಾಗುತ್ತದೆ ಎಂಬುದಕ್ಕೆ ಭಾರತ ಸ್ಪಷ್ಟವಾಗಿ ಉತ್ತರ ಕೊಟ್ಟಿದೆ” ಎಂದು ಮೋದಿ ಹೇಳಿದರು.
ನಿಮ್ಮ ನ್ಯೂಕ್ಲಿಯರ್ ಬ್ಲ್ಯಾಕ್‌ಮೆಲ್‌ಗೆ ನಾವು ಬೆದರಲ್ಲ
ಪಾಕಿಸ್ತಾನದ ನ್ಯೂಕ್ಲಿಯರ್ ಬೆದರಿಕೆಗೆ ಭಾರತ ಎದರುವುದಿಲ್ಲ ಎಂದು ಪ್ರಧಾನಿ ನರೇಂದ್ರ ಮೋದಿ ಸ್ಪಷ್ಟವಾಗಿ ಎಚ್ಚರಿಕೆ ನೀಡಿದ್ದಾರೆ. ಯಾವುದೇ ರೀತಿಯ ಪರಮಾಣು ಬ್ಲ್ಯಾಕ್‌ಮೆಲ್‌ ನಾವು ಸಹಿಸುವುದಿಲ್ಲ.
ಪಾಕಿಸ್ತಾನ ಯುದ್ಧದ ಸಿದ್ಧತೆ ಮಾಡಿಕೊಂಡಾಗ, ಭಾರತ ಬಹಾವಲ್ಪುರ್ ಮತ್ತು ಮುರಿಡ್ಕೆಯಲ್ಲಿನ ಉಗ್ರರ ತಾಣಗಳನ್ನು ನಾಶಮಾಡಿ ಆ ದೇಶದ ಯುದ್ಧ ಉತ್ಸಾಹಕ್ಕೆ ಗಂಭೀರ ಪಾಠ ಕಲಿಸಿದೆ ಎಂದು ಮೋದಿ ಹೇಳಿದರು.
“ಪಾಕಿಸ್ತಾನ ಪರಮಾಣು ಅಸ್ತ್ರ ಬಳಸುವುದಾಗಿ ಬೆದರಿಸುತ್ತಿತ್ತು. ಆದರೆ ನಾವು ಬೆದರಿಲ್ಲ. ನಾವು ನಮ್ಮ ಮೇಲೆ ದಾಳಿ ಮಾಡಿದರೆ ಹೇಗೆ ಪ್ರತಿಕ್ರಿಯೆ ನೀಡಬೇಕು ಎಂಬದು ನಮಗೆ ಗೊತ್ತಿದೆ,” ಎಂದು ಅವರು ಹೇಳಿದರು.
ಭಾರತದ ಪರಮಾಣು ನೀತಿ ಸ್ಪಷ್ಟವಾಗಿದೆ: ಭಾರತ ಮೊದಲು ಅಣ್ವಸ್ತ್ರ ಬಳಸದು. ಆದರೆ ನಮ್ಮ ಮೇಲೆ ದಾಳಿ ಮಾಡಿದರೆ, ಪರಮಾಣು ಪ್ರತಿಕ್ರಿಯೆಯಿಂದ ಹಿಂಜರಿಕೆಯಾಗದು ಎಂಬುದು ಭಾರತದ ನಿಲುವು ಎಂದು ಪ್ರಧಾನಿ ಮೋದಿ ಹೇಳಿದರು.
ಇದರಿಂದ ಪಾಕಿಸ್ತಾನ ಸೇರಿದಂತೆ ಶತ್ರು ರಾಷ್ಟ್ರಗಳಿಗೆ ಭಾರತ ಶಕ್ತಿಶಾಲಿಯಾದ ಮತ್ತು ನಿರ್ಧಾರಬದ್ಧ ರಾಷ್ಟ್ರವೆಂಬ ಸಂದೇಶ ತಲುಪಿದೆ.
