ಅಯೋಧ್ಯೆ : ಅಯೋಧ್ಯೆಯ ರಾಮಮಂದಿರದಲ್ಲಿ ರಾಮ್ ಲಲ್ಲಾ ಪ್ರತಿಮೆ ಪ್ರತಿಷ್ಠಾಪನೆ ನೆರವೇರಿಸಿದ್ದ ಪಂಡಿತ್ ಲಕ್ಷ್ಮೀಕಾಂತ್ ದೀಕ್ಷಿತ್ ತಮ್ಮ ೮೬ನೇ ವಯಸ್ಸಿನಲ್ಲಿ ಇಂದು ನಿಧನರಾಗಿದ್ದಾರೆ. ಅವರು ದೀರ್ಘಕಾಲದಿಂದ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದರು.
ಲಕ್ಷ್ಮೀಕಾಂತ್ ದೀಕ್ಷಿತ್ ಅವರು ವಾರಣಾಸಿಯ ಮೀರ್ ಘಾಟ್ ನ ಸಾಂಗ್ವೇದ್ ಕಾಲೇಜಿನಲ್ಲಿ ಹಿರಿಯ ಪ್ರಾಧ್ಯಾಪಕರಾಗಿದ್ದರು. ಈ ವಿಶ್ವವಿದ್ಯಾಲಯವನ್ನು ಕಾಶಿ ನರೇಶ್ ಅವರ ಸಹಾಯದಿಂದ ಸ್ಥಾಪಿಸಲಾಯಿತು. ಆಚಾರ್ಯ ಲಕ್ಷ್ಮೀಕಾಂತ್ ಅವರನ್ನು ಕಾಶಿಯ ಯಜುರ್ವೇದದ ಶ್ರೇಷ್ಠ ವಿದ್ವಾಂಸರಲ್ಲಿ ಒಬ್ಬರೆಂದು ಪರಿಗಣಿಸಲಾಗಿದೆ.
ಅಷ್ಟೇ ಅಲ್ಲ, ಲಕ್ಷ್ಮೀಕಾಂತ್ ದೀಕ್ಷಿತ್ ಅವರನ್ನು ಆರಾಧನೆಯಲ್ಲಿ ಪರಿಣಿತರೆಂದು ಪರಿಗಣಿಸಲಾಗಿತ್ತು. ಲಕ್ಷ್ಮೀಕಾಂತ್ ದೀಕ್ಷಿತ್ ಅವರು ತಮ್ಮ ಚಿಕ್ಕಪ್ಪ ಗಣೇಶ್ ದೀಕ್ಷಿತ್ ಭಟ್ ಅವರಿಂದ ವೇದಗಳು ಮತ್ತು ಆಚರಣೆಗಳಲ್ಲಿ ದೀಕ್ಷೆ ಪಡೆದರು. ಮೂಲತಃ ಮಹಾರಾಷ್ಟ್ರದ ಸೋಲಾಪುರ ಜಿಲ್ಲೆಯ ಜ್ಯೂರ್ ಮೂಲದ ಲಕ್ಷ್ಮಿಕಾಂತ್ ದೀಕ್ಷಿತ್ ಅವರ ಕುಟುಂಬವು ಹಲವಾರು ತಲೆಮಾರುಗಳ ಹಿಂದೆ ಕಾಶಿಯಲ್ಲಿ ನೆಲೆಸಿತು. ಅವರ ಪೂರ್ವಜರು ನಾಗ್ಪುರ ಮತ್ತು ನಾಸಿಕ್ ಸಂಸ್ಥಾನಗಳಲ್ಲಿ ಧಾರ್ಮಿಕ ಆಚರಣೆಗಳನ್ನು ನಡೆಸಿದರು. ತಮ್ಮ ಪೂರ್ವಜರು ಶಿವಾಜಿ ಮಹಾರಾಜರ ಪಟ್ಟಾಭಿಷೇಕವನ್ನೂ ಮಾಡಿದ್ದರು ಎಂದು ಲಕ್ಷ್ಮಿಕಾಂತ್ ಅವರ ಪುತ್ರ ಸುನಿಲ್ ದೀಕ್ಷಿತ್ ಈ ಹಿಂದೆ ಹೇಳಿದ್ದರು.
