ಕನ್ನಡದ ಜನಪ್ರಿಯ ನಿರೂಪಕಿ ಹಾಗೂ ನಟಿ ಅನುಶ್ರೀ ಅವರು ಇಂದು (ಆ.28) ತಮ್ಮ ಬಹುಕಾಲದ ಗೆಳೆಯ, ಕೊಡಗು ಮೂಲದ ಉದ್ಯಮಿ ರೋಷನ್ ಅವರೊಂದಿಗೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಬೆಂಗಳೂರು ಹೊರವಲಯದ ಕಗ್ಗಲಿಪುರದಲ್ಲಿರುವ ಖಾಸಗಿ ರೆಸಾರ್ಟ್‌ನಲ್ಲಿ ಬೆಳಿಗ್ಗೆ 10:56ರ ಶುಭ ಮುಹೂರ್ತದಲ್ಲಿ ಸಪ್ತಪದಿ ತುಳಿದ ನವಜೋಡಿಗೆ ಚಿತ್ರರಂಗದ ಕಲಾವಿದರು ಹಾಗೂ ಗಣ್ಯಾತಿಗಣ್ಯರು ಶುಭಾಶಯ ಕೋರಿದರು.
ಅನುಶ್ರೀ ಮತ್ತು ರೋಷನ್ ಅವರ ಮದುವೆ_CARD ಮತ್ತು ಚಿತ್ರಗಳು ಈಗಾಗಲೇ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದು, ಅಭಿಮಾನಿಗಳಿಂದ ಶುಭಾಶಯಗಳ ಮಹಾಪೂರವೇ ಹರಿದು ಬಂದಿದೆ. ವಿವಾಹದ ಪೂರ್ವದ ದಿನ (ಆ.27) ಆಯೋಜಿಸಲಾಗಿದ್ದ ಹಳದಿ ಶಾಸ್ತ್ರದಲ್ಲೂ ನವಜೋಡಿಯ ಹಸಿರು-ಹಳದಿ ಉಡುಪಿನ ಛಾಯಾಚಿತ್ರಗಳು ಭಾರೀ ವೈರಲ್ ಆಗಿವೆ. ಸುತ್ತಲೂ ಸೂರ್ಯಕಾಂತಿ ಹೂವಿನ ಅಲಂಕಾರ, ಸಂಭ್ರಮಭರಿತ ವಾತಾವರಣಕ್ಕೆ ವಿಶೇಷ ಮೆರುಗು ನೀಡಿತು.
ಹಳದಿ ಶಾಸ್ತ್ರದಲ್ಲಿ ‘ಸು ಫ್ರಂ ಸೋ’ ಚಿತ್ರದ ‘ಬಂದರೋ ಬಂದರೋ ಬಾವ ಬಂದರೋ’ ಎಂಬ ಹಾಡಿಗೆ ಅನುಶ್ರೀ-ರೋಷನ್ ಕುಣಿದಿರುವ ವಿಡಿಯೋಗಳು ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿವೆ. ಗಣೇಶ ಹಬ್ಬದ ದಿನದಂದು ನಡೆದ ಅರಿಶಿಣ ಶಾಸ್ತ್ರವು ಮದುವೆಗೆ ಶುಭಾರಂಭ ನೀಡಿದ್ದು, ಇಂದು ಅವರು ದಾಂಪತ್ಯ ಜೀವನಕ್ಕೆ ಸಾರ್ಥಕವಾಗಿ ಕಾಲಿಟ್ಟಿದ್ದಾರೆ.
ಅನುಶ್ರೀ ಅವರು ಕನ್ನಡ ಕಿರುತೆರೆ, ಸಿನಿಮಾ ಕಾರ್ಯಕ್ರಮಗಳ ಮೂಲಕ ಜನಮನ ಗೆದ್ದಿರುವ ನಟಿ ಮತ್ತು ನಿರೂಪಕಿ. ಇದೀಗ ವೈವಾಹಿಕ ಜೀವನವನ್ನೂ ಯಶಸ್ವಿಯಾಗಿ ಆರಂಭಿಸಿರುವ ಅವರು ಹೊಸ ಅಧ್ಯಾಯಕ್ಕೆ ಕಾಲಿಟ್ಟಿದ್ದಾರೆ.
