ಅಮೆರಿಕ : ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಭೀತಿ ಹೆಚ್ಚಾಗುತ್ತಿರುವ ಬೆನ್ನಲ್ಲೇ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್ ನ ಸಾಮರ್ಥ್ಯವನ್ನು ಶ್ಲಾಘಿಸಿದ್ದಾರೆ. ಇರಾನ್ ಸೇನೆ ಮತ್ತು ಅಲ್ಲಿನ ಹೋರಾಟಗಾರರು ಅತ್ಯಂತ ಸಮರ್ಥರು ಹಾಗೂ ಬಲಶಾಲಿಯಾಗಿದ್ದಾರೆ ಎಂದು ಅವರು ಒಪ್ಪಿಕೊಂಡಿದ್ದಾರೆ.
ಟ್ರಂಪ್ ಹೇಳಿಕೆಯ ಪ್ರಮುಖ ಅಂಶಗಳು ಹೀಗಿದೆ :
ಶತ್ರುವಿನ ಶಕ್ತಿ : "ಶತ್ರುವು ದುರ್ಬಲವಾಗಿದ್ದರೆ ನಮಗೆ ಯಾವುದೇ ತೊಂದರೆಯಿಲ್ಲ. ಆದರೆ ಈ ಶತ್ರು (ಇರಾನ್) ತುಂಬಾ ಬಲಶಾಲಿಯಾಗಿದ್ದಾರೆ. ಆದಾಗ್ಯೂ, ಒಂದು ತಿಂಗಳ ಹಿಂದೆ ಇದ್ದಷ್ಟು ಶಕ್ತಿ ಈಗ ಅವರ ಬಳಿ ಉಳಿದಿಲ್ಲ" ಎಂದು ಟ್ರಂಪ್ ಅಭಿಪ್ರಾಯಪಟ್ಟಿದ್ದಾರೆ.
ಅಮೆರಿಕದ ಸೇನಾ ಬಲ : ವೆನೆಜುವೆಲಾದಲ್ಲಿ ನಡೆದ ಕಾರ್ಯಾಚರಣೆಯನ್ನು ಉಲ್ಲೇಖಿಸಿದ ಅವರು, ಅಮೆರಿಕದ ಸೈನ್ಯವು ವಿಶ್ವದಲ್ಲೇ ಅತ್ಯಂತ ಶಕ್ತಿಯುತವಾಗಿದೆ ಎಂದು ಹೆಮ್ಮೆಪಟ್ಟರು. ತಮ್ಮ ಮೊದಲ ಅವಧಿಯಲ್ಲಿ ಸೈನ್ಯವನ್ನು ಬಲಪಡಿಸಿದ್ದಾಗಿ ಮತ್ತು ಎರಡನೇ ಅವಧಿಯಲ್ಲಿ ಇಷ್ಟು ಬೇಗ ಸೈನ್ಯದ ಬಳಕೆಯ ಅಗತ್ಯವಿರುತ್ತದೆ ಎಂದು ಭಾವಿಸಿರಲಿಲ್ಲ ಎಂದು ಹೇಳಿದರು.
ತೈಲ ಮತ್ತು ಅಧಿಕಾರ ಬದಲಾವಣೆ : ಇರಾನ್ ನ ತೈಲ ಸಂಪತ್ತನ್ನು ವಶಪಡಿಸಿಕೊಳ್ಳುವ ಸಾಮರ್ಥ್ಯ ಅಮೆರಿಕಕ್ಕೆ ಇತ್ತು. ಆದರೆ ಅಮೆರಿಕದ ಜನರು ಯುದ್ಧ ಸಾಕು ಎಂದು ಬಯಸುತ್ತಿದ್ದಾರೆ. ಇರಾನ್ ನಲ್ಲಿ ಈಗಿನ ಹೊಸ ಆಡಳಿತವು ಹಳೆಯ ಆಡಳಿತಕ್ಕಿಂತ ಹೆಚ್ಚು ಬುದ್ಧಿವಂತಿಕೆಯಿಂದ ವರ್ತಿಸುತ್ತಿದೆ ಎಂದು ಅವರು ತಿಳಿಸಿದರು.
ಶಾಂತಿ ಪ್ರಸ್ತಾವನೆ : ಇರಾನ್ ಕಡೆಯಿಂದ ಶಾಂತಿ ಮಾತುಕತೆಯ ಪ್ರಸ್ತಾವನೆ ಬಂದಿದೆ ಎಂದು ಟ್ರಂಪ್ ಸ್ಪಷ್ಟಪಡಿಸಿದರು. ಈ ಪ್ರಸ್ತಾವನೆಯು ಪೂರ್ಣ ಪ್ರಮಾಣದಲ್ಲಿ ತೃಪ್ತಿದಾಯಕವಾಗಿಲ್ಲದಿದ್ದರೂ, ಇದು ಬಹಳ ಮುಖ್ಯವಾದ ಬೆಳವಣಿಗೆಯಾಗಿದೆ ಎಂದು ಅವರು ಹೇಳಿದ್ದಾರೆ.ಹಾಗಾದರೆ ಟ್ರಂಪ್ ನೀಡಿದ ಎಚ್ಚರಿಕೆ ಏನು?
ಇರಾನ್ ನ F-15 ಫೈಟರ್ ಜೆಟ್ ನಾಶವಾದ ವಿಚಾರದಲ್ಲಿ ಅವರು ಸ್ವಲ್ಪ ಮಟ್ಟಿಗೆ ಅದೃಷ್ಟಶಾಲಿಯಾಗಿದ್ದರು ಎಂದು ಹೇಳಿದ ಟ್ರಂಪ್, ಒಂದು ವೇಳೆ ಇರಾನ್ ಶಸ್ತ್ರಾಸ್ತ್ರ ತ್ಯಜಿಸಿ ಶಾಂತಿಗೆ ಒಪ್ಪದಿದ್ದರೆ, ಅಲ್ಲಿನ ಪವರ್ ಪ್ಲಾಂಟ್ಗಳು ಅಥವಾ ಸೇತುವೆಗಳು ಯಾವುದೂ ಉಳಿಯುವುದಿಲ್ಲ ಎಂದು ನೇರವಾಗಿಯೇ ಎಚ್ಚರಿಕೆ ನೀಡಿದ್ದಾರೆ. (ಏಜೆನ್ಸಿಸ್)
