ಕೋಲ್ಕತ್ತಾ : ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಭಾನುವಾರ ಬೆಳಗ್ಗೆ ಕೋಲ್ಕತ್ತಾದ ರೆಡ್ ರೋಡ್ನಲ್ಲಿ ಆಯೋಜಿಸಲಾಗಿದ್ದ 12ನೇ ಅಂತರರಾಷ್ಟ್ರೀಯ ಯೋಗ ದಿನದ ಮುಖ್ಯ ಕಾರ್ಯಕ್ರಮದಲ್ಲಿ ದೇಶದ ನೇತೃತ್ವ ವಹಿಸಿದ್ದರು. ದೇಶವನ್ನುದ್ದೇಶಿಸಿ ಮಾತನಾಡಿದ ಪ್ರಧಾನಿ ಮೋದಿ, “ಇಡೀ ವಿಶ್ವ ಮತ್ತು ಇಡೀ ದೇಶವು ಪರಸ್ಪರ ನಿಕಟವಾಗಿ ಬೆಸೆದುಕೊಂಡಿರುವಂತೆ ಕಾಣುತ್ತಿದೆ, ಇದೇ ಯೋಗದ ಶಕ್ತಿ. ಯೋಗವು ಎಲ್ಲರನ್ನೂ ಒಟ್ಟುಗೂಡಿಸುತ್ತದೆ,” ಎಂದರು.
ಪ್ರಧಾನಿ ಮೋದಿ ತಮ್ಮ ಭಾಷಣದಲ್ಲಿ, “ಜೂನ್ 21ರ ಈ ದಿನವು ಭೂಮಿಯ ಕೆಲವು ಭಾಗಗಳಲ್ಲಿ ವರ್ಷದ ಅತ್ಯಂತ ದೀರ್ಘಾವಧಿಯ ದಿನವಾಗಿರುತ್ತದೆ. ಅಂತರರಾಷ್ಟ್ರೀಯ ಯೋಗ ದಿನದ ಕಾರಣದಿಂದಾಗಿ ಜೂನ್ 21ರ ಈ ದಿನವು ವಿಶ್ವದ ಅತಿ ದೊಡ್ಡ ಸಾಮೂಹಿಕ ಹಬ್ಬದ ದಿನವಾಗಿ ಮಾರ್ಪಟ್ಟಿದೆ,” ಎಂದು ಹೇಳಿದರು. ಇದಕ್ಕಾಗಿ ಕೋಲ್ಕತ್ತಾದಲ್ಲಿ ಶ್ರಮವಹಿಸಿದ ರೀತಿ ಮತ್ತು ನಾಗರಿಕರು ತಮ್ಮ ಕರ್ತವ್ಯವನ್ನು ನಿಭಾಯಿಸಿದ ರೀತಿ ಇಡೀ ದೇಶದ ಜನರಿಗೆ ದೊಡ್ಡ ಪ್ರೇರಣೆಯಾಗಿದೆ,” ಎಂದರು.
ಸಮಸ್ತ ಮಾನವಕುಲಕ್ಕೆ ಅಂತರರಾಷ್ಟ್ರೀಯ ಯೋಗ ದಿನದ ಶುಭಾಶಯಗಳನ್ನು ಕೋರಿದ ಪ್ರಧಾನಿ ಮೋದಿ, “ವಿಶ್ವದ ವಿವಿಧ ಭಾಗಗಳಿಂದ ಅದ್ಭುತವಾದ ಚಿತ್ರಗಳು ಬರುತ್ತಿವೆ. ಭಾರತದಲ್ಲಿ ಹಿಮಾಲಯದಿಂದ ಹಿಂದೂ ಮಹಾಸಾಗರದವರೆಗೆ, ಈಶಾನ್ಯ ಮತ್ತು ಪೂರ್ವದಲ್ಲಿ ಬಂಗಾಳದಿಂದ ಪಶ್ಚಿಮದಲ್ಲಿ ಸೌರಾಷ್ಟ್ರದವರೆಗೆ ಇಡೀ ದೇಶವು ಯೋಗದ ಶಕ್ತಿಯಿಂದ, ಚೈತನ್ಯದಿಂದ ತುಂಬಿ ತುಳುಕುತ್ತಿದೆ. ಇಡೀ ವಿಶ್ವ ಮತ್ತು ಇಡೀ ದೇಶವು ಪರಸ್ಪರ ಒಂದಾಗಿರುವಂತೆ ಕಾಣುತ್ತಿದೆ ಮತ್ತು ಇದೇ ಯೋಗದ ಶಕ್ತಿ. ಯೋಗವು ಎಲ್ಲರನ್ನೂ ಜೋಡಿಸುತ್ತದೆ,” ಎಂದು ಹೇಳಿದರು.
ಈ ಸಂದರ್ಭದಲ್ಲಿ ಪ್ರಧಾನಿ ಮೋದಿ ಅವರು ಪಶ್ಚಿಮ ಬಂಗಾಳದ ಮಹಾನ್ ವ್ಯಕ್ತಿಗಳನ್ನು ಸ್ಮರಿಸಿದರು. “ಯೋಗ ದಿನದ ಸಂದರ್ಭದಲ್ಲಿ ಇಂದು ಬಂಗಾಳದಲ್ಲಿ ಇರುವುದು ಅತ್ಯಂತ ವಿಶೇಷವಾಗಿದೆ. ಭಗವಾನ್ ರಾಮಕೃಷ್ಣ ಪರಮಹಂಸರಂತಹ ಸಿದ್ಧ ಸಂತರು ಅವತರಿಸಿದ, ಸ್ವಾಮಿ ವಿವೇಕಾನಂದರು ಇಡೀ ವಿಶ್ವಕ್ಕೆ ಯೋಗವನ್ನು ಪರಿಚಯಿಸಿದ, ಮಹರ್ಷಿ ಅರವಿಂದರಂತಹ ಮಹಾನ್ ಯೋಗಿ ಜನ್ಮತಾಳಿದ ಮತ್ತು ಲಾಹಿರೀ ಮಹಾಶಯರಂತಹ ಮಹಾನ್ ಯೋಗಿಗಳು ಯೋಗ ಪರಂಪರೆಯನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದ ಈ ಪವಿತ್ರ ಬಂಗಾಳದ ಭೂಮಿಯಲ್ಲಿ ಇಂದು ಸಾಮೂಹಿಕ ಯೋಗದ ಅನುಭವವು ಒಂದು ವಿಭಿನ್ನ ಆಧ್ಯಾತ್ಮಿಕ ಅನುಭೂತಿಯನ್ನು ನೀಡುತ್ತಿದೆ,” ಎಂದರು.
ಇದೇ ಸಂದರ್ಭದಲ್ಲಿ ಪ್ರಧಾನಿ ಮೋದಿ ಅವರು ಗುರುದೇವ ರವೀಂದ್ರನಾಥ ಟ್ಯಾಗೋರ್ ಅವರನ್ನೂ ನೆನೆದರು. “ಬಂಗಾಳದ ಮಣ್ಣಿನಲ್ಲಿ ಜನಿಸಿದ ಗುರುದೇವ ರವೀಂದ್ರನಾಥ ಟ್ಯಾಗೋರ್ ಅವರು, ಮನುಷ್ಯನ ಗುರುತು ಪ್ರತ್ಯೇಕವಾಗಿ ಇರುವುದರಲ್ಲಿ ಇಲ್ಲ, ಬದಲಿಗೆ ತನ್ನ ಸುತ್ತಲಿನ ಪ್ರಪಂಚದೊಂದಿಗೆ ಬೆರೆಯುವುದರಲ್ಲಿದೆ ಎಂದು ನಂಬಿದ್ದರು. ಈ ಒಡನಾಟವೇ ಯೋಗದ ಮೂಲ ಮಂತ್ರವಾಗಿದೆ,” ಎಂದರು.
ಅವರು ಮಹರ್ಷಿ ಅರವಿಂದರ ಮಾತುಗಳನ್ನೂ ಪುನರುಚ್ಚರಿಸಿದರು. ಪ್ರಧಾನಿ ಮೋದಿ ಮಾತನಾಡಿ, “ನಮಗೆ ಅರಿವಿದ್ದರೂ ಇಲ್ಲದಿದ್ದರೂ ನಮ್ಮ ಇಡೀ ಜೀವನವೇ ಯೋಗವಾಗಿದೆ ಎಂದು ಮಹರ್ಷಿ ಅರವಿಂದರು ಹೇಳುತ್ತಿದ್ದರು. ಯೋಗವು ನಮ್ಮ ಸ್ವಭಾವಕ್ಕೆ ಬಂದಾಗ, ಅದು ಮಾನವ ಏಕತೆಗೆ ಆಧಾರವಾಗುತ್ತದೆ. ಯೋಗವು ಕೇವಲ ದೈಹಿಕ ಶ್ರಮದ ಸಾಧನವಲ್ಲ, ಯೋಗವು ಕೇವಲ ಒಂದು ನಿರ್ದಿಷ್ಟ ವಯಸ್ಸಿನವರಿಗೆ ಮಾತ್ರ ಸೀಮಿತವೂ ಅಲ್ಲ. ಯೋಗವು ಮಾನವ ಜೀವನಕ್ಕೆ, ಪ್ರಜ್ಞೆ ಹಾಗೂ ಶಕ್ತಿಯೊಂದಿಗೆ ಸಿಗುವ ಒಂದು ಬೆಳಕಾಗಿದೆ,” ಎಂದರು.
“ನಾವು ‘ಆರೋಗ್ಯಕರ ವೃದ್ಧಾಪ್ಯಕ್ಕಾಗಿ ಯೋಗ’ದ ಬಗ್ಗೆ ಮಾತನಾಡುವಾಗ, ಹೆಚ್ಚುತ್ತಿರುವ ವಯಸ್ಸು ಮಾನವನ ಸಾಮರ್ಥ್ಯವನ್ನು ಸೀಮಿತಗೊಳಿಸದಂತೆ ನೋಡಿಕೊಳ್ಳಲು ನಾವು ಪ್ರಯತ್ನಿಸುತ್ತಿದ್ದೇವೆ ಎಂದರ್ಥ. ಯೋಗವು ಮಾನವ ಜೀವನವನ್ನು ನಿರಂತರ ಪ್ರಗತಿ ಮತ್ತು ಆತ್ಮೋನ್ನತಿಯತ್ತ ಪ್ರೇರೇಪಿಸುತ್ತದೆ,” ಎಂದು ಪ್ರಧಾನಿ ಮೋದಿ ಹೇಳಿದರು.
“ನಮ್ಮ ಗುರಿ ಏನೆಂದರೆ, ನಾವು 40 ನೇ ವಯಸ್ಸಿನಲ್ಲಿ 20 ನೇ ವಯಸ್ಸಿಗಿಂತ ಹೆಚ್ಚು ಮೃದುತ್ವವನ್ನು (ಲವಲವಿಕೆಯನ್ನು) ಹೊಂದಿರಬೇಕು. 50 ನೇ ವಯಸ್ಸಿನಲ್ಲಿ ನಾವು 30 ನೇ ವಯಸ್ಸಿಗಿಂತ ಹೆಚ್ಚು ಶಕ್ತಿಯುತರಾಗಿರಬೇಕು. 70 ನೇ ವಯಸ್ಸಿನಲ್ಲಿ ನಾವು 50 ನೇ ವಯಸ್ಸಿಗಿಂತ ಜೀವನಶೈಲಿಗೆ ಸಂಬಂಧಿಸಿದ ಕಾಯಿಲೆಗಳ ವಿರುದ್ಧ ಹೆಚ್ಚಿನ ರೋಗನಿರೋಧಕ ಶಕ್ತಿಯನ್ನು ಹೊಂದಿರಬೇಕು. ಈ ನಿಟ್ಟಿನಲ್ಲಿ ಯೋಗವು ನಮಗೆ ಸಹಾಯ ಮಾಡುತ್ತದೆ,” ಎಂದು ಹೇಳಿದರು.
