ಮಂಗಳೂರು (ದಕ್ಷಿಣ ಕನ್ನಡ) : 604 ಪುಟಗಳು. 302 ದಿನಗಳು.. 2416 ಗಂಟೆಗಳು.. ಪವಿತ್ರ ಗ್ರಂಥದ ತೂಕ 14 ಕೆಜಿ. ಕರ್ನಾಟಕದ ಇತಿಹಾಸದಲ್ಲಿಯೇ ಮೊತ್ತ ಮೊದಲ ಬಾರಿಗೆ ಪವಿತ್ರಗ್ರಂಥ ‘ಕುರಾನ್’ ನನ್ನು ಕ್ಯಾಲಿಗ್ರಾಫಿ ಪೆನ್ ಮೂಲಕ ಕೈಬರಹದಲ್ಲಿ ಬರೆಯುವ ಮೂಲಕ ಈ 22 ವರ್ಷದ ವಿದ್ಯಾರ್ಥಿನಿಯೊಬ್ಬಳು ತನ್ನ ಅದ್ವಿತೀಯ ಸಾಧನೆ ಮಾಡಿದ್ದಾಳೆ. ಅಷ್ಟಕ್ಕೂ ಈ ಸಾಧನೆ ಮಾಡಿದ ಯುವತಿ ಯಾರು?
ನೀವಿಲ್ಲಿ ನೋಡ್ತಿರೋ ಈ ಯುವತಿಯ ಹೆಸರು ಫಾತಿಮಾ ಸಜ್ ಲಾ. ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿನ ಕುಂಬ್ರ ಮರ್ಕಝುಲ್ ಹುದಾ ಮಹಿಳಾ ಕಾಲೇಜ್‌ನ ವಿದ್ಯಾರ್ಥಿನಿಯಾಗಿದ್ದ ಫಾತಿಮಾ ಸಜ್‌ಲ ಪವಿತ್ರ ಕುರ್ಆನ್ ನ 30 ಕಾಂಡಗಳನ್ನು ಕೈಯಲ್ಲಿ ಬರೆಯುವ ಮೂಲಕ ಗಮನ ಸೆಳೆದಿದ್ದಾರೆ. ಸುಮಾರು ಐದು ವರ್ಷಗಳಲ್ಲಿ ಒಟ್ಟು 302 ದಿನಗಳನ್ನು ಬಳಸಿ ಸಜ್ಲಾ ಈ ಸಾಧನೆ ಮಾಡಿದ್ದಾರೆ. ದಕ್ಷಿಣ ಕನ್ನಡ ಜಿಲ್ಲೆಯ ಬೈತಡ್ಕ ನಿವಾಸಿ ಹಾಗೂ
ಬೈತಡ್ಕ ಜುಮಾ ಮಸೀದಿ ದರ್ಗಾ ಶರೀಫ್ ಇದರ ಮಾಜಿ ಅಧ್ಯಕ್ಷ ಇಸ್ಮಾಯಿಲ್ ಹಾಜಿ ಮತ್ತು ಝಹ್ರಾ ಜಾಸ್ಮೀನ್ ದಂಪತಿಯ ಪುತ್ರಿಯಾಗಿರುವ ಸಜ್ಲಾ ಕುರ್ಆನ್ ಬರವಣಿಗೆಯನ್ನು 2021ರ ಜನವರಿಯಲ್ಲಿ ಆರಂಭಿಸಿದ್ದರು. ಈ ಸಂದರ್ಭದಲ್ಲಿ ಅವರು ಕುಂಬ್ರ ಮರ್ಕಝುಲ್ ಹುದಾ ಮಹಿಳಾ ಕಾಲೇಜಿನಲ್ಲಿ ಬಿಕಾಂ ಪದವಿ ವ್ಯಾಸಂಗ ಮಾಡುತ್ತಿದ್ದರು.
ಸಜ್ಲಾ 2021ರಲ್ಲಿ ಕಲಿಕೆಯ ಜೊತೆಗೆ ಕುರ್ಆನ್ ಬರವಣಿಗೆ ಆರಂಭಿಸಿದ್ದರೂ ಆ ಸಂದರ್ಭದಲ್ಲಿ 25 ದಿನಗಳ ಬರವಣಿಗೆ ಪೂರ್ತಿಗೊಂಡಾಗ ಕೈ ಸೆಳೆತ ಆರಂಭಗೊಂಡ ಕಾರಣ ಅವರು ಬರವಣಿಗೆಯನ್ನು ನಿಲ್ಲಿಸಿದ್ದರು. ಈ ಸಂದರ್ಭದಲ್ಲಿ ಅವರು ಮರ್ಕಝ್ ಕಾಲೇಜ್‌ನಲ್ಲಿ ಬಿಕಾಂ ಪದವಿ ವ್ಯಾಸಂಗ ಮಾಡುತ್ತಿದ್ದರು. ಆದರೂ ಛಲ ಬಿಡದ ಅವರು 2024ರ ಅಕ್ಟೋಬರ್‌ನಿಂದ ಬರವಣಿಗೆಯನ್ನು ಪುನರಾರಂಭಿಸಿದ ಅವರು ಇದೀಗ ಪೂರ್ಣಗೊಳಿಸಿದ್ದಾರೆ. ಇದೀಗ ಇದೇ ಆಗಸ್ಟ್‌ನಲ್ಲಿ ಪವಿತ್ರ ಕುರ್‌ಆನಿನ ಪೂರ್ತಿ 30 ಕಾಂಡವನ್ನು(ಜುಝುಅ) ಬರೆದು ಮುಗಿಸಿದ್ದಾರೆ.
30 ಕಾಂಡಗಳನ್ನು(ಜುಝುಅ) ಹೊಂದಿರುವ ಈ ಕುರ್ಆನ್ ಆಕರ್ಷಕವಾದ ಕೆಂಪು ಜೊತೆಗೆ ಚಿನ್ನಮಿಶ್ರಿತ ಬಣ್ಣದ ಹೊರಪುಟ ಹೊದಿಕೆಯ ವಿನ್ಯಾಸವನ್ನು ಹೊಂದಿದ್ದು, ಇದನ್ನು ಬರೆದು ಮುಗಿಸಲು ಅವರು ಒಟ್ಟು 302 ದಿನಗಳನ್ನು ಬಳಸಿಕೊಂಡಿದ್ದಾರೆ. ಒಂದು ಪುಟಕ್ಕೆ ಬರೆಯಲು 4 ಗಂಟೆಗಳ ಅವಧಿ ಬೇಕಾಗಿತ್ತು. ಕೆಲವೊಂದು ದಿನಗಳಲ್ಲಿ 8 ಗಂಟೆಗಳನ್ನು ಬಳಸಿಕೊಂಡು 2 ಪುಟಗಳನ್ನು ರಚನೆ ಮಾಡಿದ್ದಾರೆ. ಹೀಗೆ ಒಟ್ಟು 2416 ಗಂಟೆ ಬಳಕೆಯಾಗಿದೆ. ಇದಕ್ಕಾಗಿ ಬಿಳಿ, ತಿಳಿನೀಲಿ, ತಿಳಿ ಹಸಿರು ಬಣ್ಣದ ಕಾಗದವನ್ನು ಬಳಸಿಕೊಳ್ಳಲಾಗಿದೆ. ಕಪ್ಪು ಬಣ್ಣದ ಕಲಂ ಮತ್ತು ಮಸಿಯಿಂದ ಅಕ್ಷರದ ರೂಪ ಕೊಡಲಾಗಿದೆ. ಒಟ್ಟು 604 ಪುಟಗಳ ಈ ಕುರ್ಆನ್ ಪ್ರತಿಯು 13.8 ಕೆಜಿ ತೂಕ ಹೊಂದಿದೆ. 22 ಇಂಚು ಅಗಲ, 14 ಇಂಚು ಉದ್ದ ಮತ್ತು 5.5 ಇಂಚು ದಪ್ಪವನ್ನು ಹೊಂದಿದೆ. ಈ ಗ್ರಂಥ ರಚನೆಗೆ 25 ಇಂಕ್ ಬಾಟಲಿಗಳನ್ನು ಬಳಿಸಿರುವ ಆಕೆ 20 ಪರ್ಮನೆಂಟ್ ಮಾರ್ಕರ್, 152 ಚಾರ್ಟ್ ಪೇಪರ್ 100 ಪೀಸು ಇರೇಜರ್ ಉಪಯೋಗಿಸಿದ್ದಾಳೆ.
ಸಾಮಾನ್ಯವಾಗಿ ಕ್ಯಾಲಿಗ್ರಫಿ ಪೆನ್ ಗಳ ಮೂಲಕ ಬರೆಯುತ್ತಾರೆ. ಆದರೆ ಸಜ್ಲಾ ಬಾಟಲಿಗೆ ಪೆನ್ ಅದ್ದಿ ಬರೆಯುವ ಕಪ್ಪು ಬಣ್ಣದ ಕಲಂ ಮತ್ತು ಮಸಿಯನ್ನು ಬಳಸಿ ಅಕ್ಷರವನ್ನು ಸ್ಪುಟವಾಗಿ ಬರೆದಿರುವುದು ವಿಶೇಷವಾಗಿದೆ. ಅಂಗಶುದ್ದಿಯೊಂದಿಗೆ ಕಿಬ್ಲಾಕ್ಕೆ ಮುಖ ಮಾಡಿ ಕುಳಿತು ಎಲ್ಲವನ್ನೂ ಬರೆದಿದ್ದಾರೆ.
-ಇಸ್ಮಾಯಿಲ್ ಹಾಜಿ, ತಂದೆ
-ಅಬ್ದುಲ್ ರಹಿಮಾನ್ ಹಾಜಿ ಅರಿಯಡ್ಕ, ಕುಂಬ್ರ ಮರ್ಕಝ್‌ನ ಆಡಳಿತ ಸಮಿತಿ ಅಧ್ಯಕ್ಷ
ಫಾತಿಮಾ ಸಜ್ಲಾ ಅವರು ಕೈಬರಹದ ಮೂಲಕ ಬರೆದ ಕುರ್ಆನ್ ಲೋಕಾರ್ಪಣಾ ಕಾರ್ಯಕ್ರಮ ಆ.16ರಂದು ಕುಂಬ್ರ ಮರ್ಕಝುಲ್ ಹುದಾ ಮಹಿಳಾ ಕಾಲೇಜಿನಲ್ಲಿ ನಡೆಯಿತು.
ಕುಂಬ್ರ ಮರ್ಕಝ್‌ನ ಆಡಳಿತ ಸಮಿತಿಯ ಉಪಾಧ್ಯಕ್ಷ ಅಬ್ದುರ್ರಶೀದ್ ಝೈನಿ ಕಾಮಿಲ್ ವಿದ್ಯಾರ್ಥಿನಿ ಬಗ್ಗೆ
ಮಾತನಾಡಿದರು. ಕೇರಳದ ಮರ್ಕಝ್ ನಾಲೇಜ್ ಸಿಟಿಯ ಪ್ರೊ.ಯಾಸೀನ್ ಸಖಾಫಿ ಅಲ್ ಅಝ್ಹರಿ ಕುರ್ಆನ್ ಪ್ರತಿಯನ್ನು ಲೋಕಾರ್ಪಣೆಗೊಳಿಸಿದರು. ಫಾತಿಮಾ ಸಜ್‌ಲ ಹಾಗೂ ಅವರ ತಂದೆ, ತಾಯಿಯನ್ನು ಇದೇ ಸಂದರ್ಭದಲ್ಲಿ ಸಂಸ್ಥೆ ವತಿಯಿಂದ ಶಾಲು ಹೊದಿಸಿ ಸನ್ಮಾನಿಸಿ ಅಭಿನಂದಿಸಲಾಯಿತು.
ಇನ್ನು ಸಜ್ ಲಾಗೆ ಕೇವಲ 4 ತಿಂಗಳಲ್ಲಿ ಪೂರ್ತಿ ಮಾಡುವ ಪುಟ್ಟ ಗಾತ್ರದ ಇನ್ನೊಂದು ಕೈ ಬರಹದ ಕುರಾನ್ ಬರೆಯುವ ಬಯಕೆ ಇದೆ. ಇದೇ ರೀತಿಯಲ್ಲಿ ಬೇರೆ ರಾಜ್ಯದಲ್ಲಿ ಕುರಾನ್ ಗ್ರಂಥವನ್ನು ಕೈ ಬರಹದ ಮೂಲಕ ಮೂವರು ವಿದ್ಯಾರ್ಥಿನಿಯರು ಬರೆದಿದ್ದಾರೆ. ಆದರೆ ಓರ್ವ ಕನ್ನಡತಿ ಈ ಗ್ರಂಥವನ್ನು ಕೈ ಬರಹದ ಮೂಲಕ ದಾಖಲಿಸಿರುವುದು ಇದೇ ಮೊದಲು..
ಪವಿತ್ರ ಧರ್ಮಗ್ರಂಥವಾದ 604 ಪುಟಗಳನ್ನು ಒಳಗೊಂಡ ಕುರ್‌ಆನ್‌ನ್ನು ಮಸಿ ಮತ್ತು ಕಲಂ ಬಳಸಿ ಕೈಬರಹದ ಮೂಲಕ ಬರೆದು ಮುಗಿಸಿದ ಕರ್ನಾಟಕದ ಏಕೈಕ ವಿದ್ಯಾರ್ಥಿನಿಯಾಗಿರುವ ಫಾತಿಮಾ ಸಜ್‌ಲಾರವರ ಈ ಸಾಧನೆಯು ಲಿಮ್ಕಾ ಬುಕ್ ಆಫ್ ರೆಕಾರ್ಡ್‌ಗೆ ಸೇರಬೇಕಾಗಿರುವ ಎಲ್ಲಾ ಅರ್ಹತೆಗಳನ್ನು ಹೊಂದಿದೆ. ಏಕೆಂದರೆ ಕರ್ನಾಟಕದಿಂದ ಫಾತಿಮಾ ಸಜ್‌ಲಾರವರು ಮಾತ್ರ ಈ ರೀತಿ ಕೈಬರಹದ ಮೂಲಕ ಕುರ್‌ಆನನ್ನು ಬರೆದ ವಿದ್ಯಾರ್ಥಿನಿಯಾಗಿದ್ದಾರೆ. ಇವ್ರ ಈ ಪ್ರಯತ್ನ ಲಿಮ್ಕಾ ರೆಕಾರ್ಡ್ ಗೆ ಸೇರಲಿ ಎಂಬುದೇ ನಮ್ಮ ಆಶಯ.-ಶಂಶೀರ್ ಬುಡೋಳಿ, ರಾಜ್ಯಧರ್ಮ, ಮಂಗಳೂರು
