ನವದೆಹಲಿ : ದೇಶದಲ್ಲಿ ಎಲೆಕ್ಟ್ರಿಕ್ ವಾಹನಗಳ (EV) ಜನಪ್ರಿಯತೆ ದಿನದಿಂದ ದಿನಕ್ಕೆ ಹೊಸ ದಾಖಲೆ ಬರೆಯುತ್ತಿದೆ. ಫೆಡರೇಶನ್ ಆಫ್ ಆಟೋಮೊಬೈಲ್ ಡೀಲರ್ಸ್ ಅಸೋಸಿಯೇಷನ್ (FADA) ಬಿಡುಗಡೆ ಮಾಡಿರುವ ಇತ್ತೀಚಿನ ಚಿಲ್ಲರೆ ಮಾರಾಟದ ಅಂಕಿ-ಅಂಶಗಳ ಪ್ರಕಾರ, ಜೂನ್ 2026 ರಲ್ಲಿ ಎಲೆಕ್ಟ್ರಿಕ್ ಕಾರುಗಳು, ದ್ವಿಚಕ್ರ, ತ್ರಿಚಕ್ರ ಮತ್ತು ವಾಣಿಜ್ಯ ವಾಹನಗಳ ಮಾರಾಟದಲ್ಲಿ ಅಭೂತಪೂರ್ವ ಪ್ರಗತಿ ಕಂಡುಬಂದಿದೆ.
ಸ್ವಚ್ಛ ಮತ್ತು ಪರಿಸರಸ್ನೇಹಿ ಸಾರಿಗೆಯತ್ತ ಭಾರತೀಯ ಗ್ರಾಹಕರು ವೇಗವಾಗಿ ಮುಖ ಮಾಡುತ್ತಿರುವುದನ್ನು ಈ ಅಂಕಿ-ಅಂಶಗಳು ಸ್ಪಷ್ಟಪಡಿಸುತ್ತವೆ.
ಎಲೆಕ್ಟ್ರಿಕ್ ಕಾರುಗಳು (ಪ್ರಯಾಣಿಕ ವಾಹನಗಳು)
ಇವಿ ಕಾರುಗಳ ಮಾರಾಟದಲ್ಲಿ ಅತ್ಯಂತ ಹೆಚ್ಚಿನ ಬೆಳವಣಿಗೆ ದಾಖಲಾಗಿದ್ದು, ಬರೋಬ್ಬರಿ 107.75% ಹೆಚ್ಚಳವಾಗಿದೆ. ಜೂನ್ 2025 ರಲ್ಲಿ 15,318 ಯುನಿಟ್ಗಳು ಮಾರಾಟವಾಗಿದ್ದರೆ, ಜೂನ್ 2026 ರಲ್ಲಿ ಈ ಸಂಖ್ಯೆ 31,823 ಯುನಿಟ್ಗಳಿಗೆ ತಲುಪಿದೆ. ಇನ್ನು ಮೇ 2026 ಕ್ಕೆ ಹೋಲಿಸಿದರೆ ಮಾರಾಟದಲ್ಲಿ 19.27% ಪ್ರಗತಿಯಾಗಿದೆ.
ಒಟ್ಟು ಪ್ರಯಾಣಿಕ ವಾಹನ ಮಾರುಕಟ್ಟೆಯಲ್ಲಿ ಇವಿ ಕಾರುಗಳ ಪಾಲು 7.7% ಕ್ಕೆ ಏರಿದೆ (ಇದು ಜೂನ್ 2025 ರಲ್ಲಿ 4.8% ಆಗಿತ್ತು).
ಎಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳು (Two-Wheelers)
ಚಿಲ್ಲರೆ ಮಾರಾಟವು 74.98% ಹೆಚ್ಚಳ ಕಂಡು 1,93,735 ಯುನಿಟ್ಗಳಿಗೆ ತಲುಪಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 1,10,719 ಇವಿ ಸ್ಕೂಟರ್/ಬೈಕ್ಗಳು ಮಾರಾಟವಾಗಿದ್ದವು. ಈ ವಿಭಾಗದಲ್ಲಿ ಇವಿ ಮಾರುಕಟ್ಟೆ ಪಾಲು 10.6% ಗೆ ತಲುಪಿದೆ.ಎಲೆಕ್ಟ್ರಿಕ್ ತ್ರಿಚಕ್ರ ವಾಹನಗಳು (Three-Wheelers)
ಇವಿ ತ್ರಿಚಕ್ರ ವಾಹನಗಳ ಮಾರಾಟ 27.38% ರಷ್ಟು ಹೆಚ್ಚಾಗಿದ್ದು, 77,448 ಯುನಿಟ್ಗಳು ಮಾರಾಟವಾಗಿವೆ. ಒಟ್ಟು ತ್ರಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ಎಲೆಕ್ಟ್ರಿಕ್ ವಾಹನಗಳೇ 64.1% ರಷ್ಟು ಸಿಂಹಪಾಲನ್ನು ಹೊಂದುವ ಮೂಲಕ ತಮ್ಮ ಸಂಪೂರ್ಣ ಪ್ರಾಬಲ್ಯವನ್ನು ಕಾಯ್ದುಕೊಂಡಿವೆ.
ಎಲೆಕ್ಟ್ರಿಕ್ ವಾಣಿಜ್ಯ ವಾಹನಗಳು (Commercial Vehicles)
ಈ ವಿಭಾಗದಲ್ಲಿ ಅತ್ಯಂತ ವೇಗದ ಬೆಳವಣಿಗೆ ಕಂಡುಬಂದಿದ್ದು, ಮಾರಾಟವು 163.7% ರಷ್ಟು ಜಿಗಿತ ಕಂಡಿದೆ. ಜೂನ್ 2025 ರಲ್ಲಿ 1,219 ವಾಹನಗಳು ಮಾರಾಟವಾಗಿದ್ದರೆ, ಜೂನ್ 2026 ರಲ್ಲಿ 3,214 ಯುನಿಟ್ಗಳು ಮಾರಾಟವಾಗಿವೆ. ಇದರ ಮಾರುಕಟ್ಟೆ ಪಾಲು 3.53% ಕ್ಕೆ ಏರಿದೆ.
ದೇಶದಲ್ಲಿ ಇವಿ ವಾಹನಗಳ ಮಾರುಕಟ್ಟೆ ಪಾಲು ನಿರಂತರವಾಗಿ ಗಟ್ಟಿಯಾಗುತ್ತಿರುವುದನ್ನು ಈ ತಾಜಾ ಅಂಕಿ-ಅಂಶಗಳು ತೋರಿಸುತ್ತಿವೆ. ಮುಂಬರುವ ದಿನಗಳಲ್ಲಿ ಭಾರತೀಯ ಆಟೋಮೊಬೈಲ್ ರಂಗದಲ್ಲಿ ಎಲೆಕ್ಟ್ರಿಕ್ ವಾಹನಗಳ ವಿಸ್ತರಣೆ ಇನ್ನೂ ಹತ್ತಾರು ಪಟ್ಟು ವೇಗವಾಗಿ ಆಗಲಿದೆ ಎಂದು ಫಾಡಾ ವಿಶ್ವಾಸ ವ್ಯಕ್ತಪಡಿಸಿದೆ.
