ಅಥೆನ್ಸ್ : ಭಾರತದ ಹೆಮ್ಮೆಯ ಡಿಜಿಟಲ್ ಪಾವತಿ ವ್ಯವಸ್ಥೆಯಾದ ‘ಯೂನಿಫೈಡ್ ಪೇಮೆಂಟ್ಸ್ ಇಂಟರ್ಫೇಸ್’ (UPI) ಇದೀಗ ಅಧಿಕೃತವಾಗಿ ಗ್ರೀಸ್ನಲ್ಲಿ ಆರಂಭಗೊಂಡಿದೆ. ಭಾರತೀಯ ಪಾವತಿಗಳ ನಿಗಮದ ಅಂತರರಾಷ್ಟ್ರೀಯ ಶಾಖೆ ಮತ್ತು ಗ್ರೀಸ್ ನ ಯುರೋಬ್ಯಾಂಕ್ ನಡುವಿನ ಪಾಲುದಾರಿಕೆಯೊಂದಿಗೆ ಈ ಸೇವೆಗೆ ಚಾಲನೆ ನೀಡಲಾಗಿದೆ.
ಅಥೆನ್ಸ್ನಲ್ಲಿರುವ ಯುರೋಬ್ಯಾಂಕ್ನ ಪ್ರಧಾನ ಕಚೇರಿಯಲ್ಲಿ ನಡೆದ ಸಮಾರಂಭದಲ್ಲಿ, ಕೇಂದ್ರ ವಾಣಿಜ್ಯ ಸಚಿವ ಪಿಯೂಷ್ ಗೋಯಲ್ ಅವರು ಯುಪಿಐ ಸೇವೆಯ ಲೈವ್ ಪ್ರದರ್ಶನವನ್ನು ವೀಕ್ಷಿಸಿದರು. ಈ ಸಂದರ್ಭದಲ್ಲಿ ಯುರೋಬ್ಯಾಂಕ್ ಸಿಇಒ ಫೋಕಿಯನ್ ಕರಾವಿಯಾಸ್ ಮತ್ತು ಫೇರ್ಫ್ಯಾಕ್ಸ್ ಡಿಜಿಟಲ್ ಸರ್ವಿಸಸ್ ನ ಸಿಇಒ ಸಂಜಯ್ ತುಗ್ನಾಯತ್ ಉಪಸ್ಥಿತರಿದ್ದರು.
ಸುಲಭ ಮತ್ತು ವೇಗದ ವರ್ಗಾವಣೆ : ಗ್ರೀಸ್ನಲ್ಲಿ ಯುಪಿಐ ಲಭ್ಯವಾಗುವುದರಿಂದ, ಅರ್ಹ ಗ್ರಾಹಕರು ತಕ್ಷಣವೇ, ಸುರಕ್ಷಿತವಾಗಿ ಮತ್ತು ಸುಲಭವಾಗಿ ಹಣವನ್ನು ವರ್ಗಾಯಿಸಲು ಸಾಧ್ಯವಾಗುತ್ತದೆ.
ಕಡಿಮೆ ವೆಚ್ಚ : ಸಾಂಪ್ರದಾಯಿಕ ಹಣ ವರ್ಗಾವಣೆ ವಿಧಾನಗಳಿಗೆ ಹೋಲಿಸಿದರೆ, ಯುಪಿಐ ಮೂಲಕ ವಹಿವಾಟು ನಡೆಸುವಾಗ ವೆಚ್ಚವು ಗಣನೀಯವಾಗಿ ಕಡಿಮೆಯಾಗುತ್ತದೆ.
ಜಾಗತಿಕ ಮನ್ನಣೆ : ಈ ಬಗ್ಗೆ ಮಾತನಾಡಿದ ಸಚಿವ ಪಿಯೂಷ್ ಗೋಯಲ್, “ಭಾರತದ ಡಿಜಿಟಲ್ ಪಾವತಿ ವ್ಯವಸ್ಥೆಯ ಜಾಗತಿಕ ವಿಸ್ತರಣೆಯಲ್ಲಿ ಇದು ಮತ್ತೊಂದು ಮಹತ್ವದ ಮೈಲಿಗಲ್ಲಾಗಿದೆ. ಯುಪಿಐಗೆ ಸಿಗುತ್ತಿರುವ ಜಾಗತಿಕ ಮನ್ನಣೆಯು, ತಂತ್ರಜ್ಞಾನ ಆಧಾರಿತ ಪರಿಹಾರಗಳ ಮೂಲಕ ಜಾಗತಿಕ ಸಮೃದ್ಧಿಯನ್ನು ಉತ್ತೇಜಿಸುವ ಪ್ರಧಾನಿ ನರೇಂದ್ರ ಮೋದಿಯವರ ದೃಷ್ಟಿಕೋನಕ್ಕೆ ದೊರೆತ ಭರವಸೆಯಾಗಿದೆ” ಎಂದು ತಿಳಿಸಿದರು.
ದ್ವಿಪಕ್ಷೀಯ ಬಾಂಧವ್ಯ ಬಲವರ್ಧನೆ
ಕೇಂದ್ರ ಸಚಿವ ಪಿಯೂಷ್ ಗೋಯಲ್ ಅವರು ಉಭಯ ದೇಶಗಳ ನಡುವಿನ ಆರ್ಥಿಕ ಸಹಕಾರ ಮತ್ತು ವಾಣಿಜ್ಯ ಪಾಲುದಾರಿಕೆಯನ್ನು ಬಲಪಡಿಸುವ ಉದ್ದೇಶದಿಂದ ಉನ್ನತ ಮಟ್ಟದ ಉದ್ಯಮಿಗಳು ಮತ್ತು ಅಧಿಕಾರಿಗಳ ನಿಯೋಗದೊಂದಿಗೆ ಗ್ರೀಸ್ಗೆ ಭೇಟಿ ನೀಡಿದ್ದಾರೆ. ಅಥೆನ್ಸ್ನಲ್ಲಿ ನಡೆದ ಹಲವು ಉನ್ನತ ಮಟ್ಟದ ಸಭೆಗಳಲ್ಲಿ ಆರ್ಥಿಕ ಸಂಬಂಧಗಳನ್ನು ವೃದ್ಧಿಸುವ ಮತ್ತು ಹೂಡಿಕೆಯ ಅವಕಾಶಗಳನ್ನು ಅನ್ವೇಷಿಸುವ ಕುರಿತು ಚರ್ಚೆ ನಡೆಸಲಾಯಿತು. (ಏಜೆನ್ಸಿಸ್)
