ನವದೆಹಲಿ : ವಿಶ್ವದ ಅತ್ಯಂತ ಪ್ರಮುಖ ಸಮುದ್ರ ವ್ಯಾಪಾರ ಮಾರ್ಗಗಳಲ್ಲಿ ಒಂದಾದ ಸ್ಟ್ರೇಟ್ ಆಫ್ ಹಾರ್ಮುಜ್ ನಿರ್ವಹಣೆಗಾಗಿ ಇರಾನ್ ಹೊಸದಾಗಿ “ಪರ್ಷಿಯನ್ ಗಲ್ಫ್ ಸ್ಟ್ರೇಟ್ ಅಥಾರಿಟಿ ” ಎಂಬ ಹೊಸ ಸಂಸ್ಥೆಯನ್ನು ರಚಿಸುವುದಾಗಿ ಘೋಷಿಸಿದೆ. ಈ ಹೊಸ ಸಂಸ್ಥೆಯು ಸಮುದ್ರ ಸಂಚಾರದ ಮೇಲೆ ‘ರಿಯಲ್-ಟೈಮ್’ (ನೈಜ-ಸಮಯದ) ನಿಗಾ ಇಡಲಿದೆ ಎಂದು ಇರಾನ್ನ ಸುಪ್ರೀಂ ನ್ಯಾಷನಲ್ ಸೆಕ್ಯೂರಿಟಿ ಕೌನ್ಸಿಲ್ ಸಾಮಾಜಿಕ ಮಾಧ್ಯಮದ ಮೂಲಕ ತಿಳಿಸಿದೆ.
ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನತೆ ಮತ್ತು ಕಡಲ ಭದ್ರತೆಯ ಆತಂಕಗಳು ಹೆಚ್ಚಾಗುತ್ತಿರುವ ಬೆನ್ನಲ್ಲೇ ಇರಾನ್ ಈ ಕ್ರಮ ಕೈಗೊಂಡಿದೆ. ಮತ್ತೊಂದೆಡೆ, ಅಮೆರಿಕಾದ ವಿಮಾನಗಳು ಭಾರಿ ಪ್ರಮಾಣದ ಶಸ್ತ್ರಾಸ್ತ್ರಗಳೊಂದಿಗೆ ಇಸ್ರೇಲ್ ತಲುಪಿವೆ ಮತ್ತು ಇಸ್ರೇಲ್ ಸೇನೆಯನ್ನು ಹೈ ಅಲರ್ಟ್ನಲ್ಲಿ ಇಡಲಾಗಿದೆ ಎಂದು ಇಸ್ರೇಲಿ ಮಾಧ್ಯಮಗಳು ವರದಿ ಮಾಡಿವೆ.
ಹೊಸದಾಗಿ ರಚಿಸಲಾದ PGSA ಸಂಸ್ಥೆಯು ಹೊರ್ಮುಜ್ ಜಲಸಂಧಿಯ ಕಾರ್ಯಾಚರಣೆ ಮತ್ತು ಅಲ್ಲಿನ ಇತ್ತೀಚಿನ ವಿದ್ಯಮಾನಗಳ ಕುರಿತು ನಿರಂತರ ನಿಗಾ ಇಟ್ಟು, ರಿಯಲ್-ಟೈಮ್ ಅಪ್ಡೇಟ್ಗಳನ್ನು ಬಿಡುಗಡೆ ಮಾಡಲಿದೆ.
ಹಡಗುಗಳ ಸಂಚಾರಕ್ಕಾಗಿ ಹೊಸ ಸಾರಿಗೆ ನಿಯಮಗಳು ಮತ್ತು ಅನುಮತಿ ವ್ಯವಸ್ಥೆಯನ್ನು ಜಾರಿಗೆ ತರುವ ಬಗ್ಗೆ ಇರಾನ್ ಈಗಾಗಲೇ ಸೂಚನೆ ನೀಡಿದೆ.
ಈ ಹೊಸ ವ್ಯವಸ್ಥೆಯಡಿ ಒದಗಿಸಲಾಗುವ ನಿರ್ದಿಷ್ಟ ಸೇವೆಗಳಿಗಾಗಿ ಅಗತ್ಯ ಶುಲ್ಕವನ್ನು ಸಹ ವಿಧಿಸಲಾಗುತ್ತದೆ.
‘ಫ್ರೀಡಂ ಪ್ರಾಜೆಕ್ಟ್’ಗೆ ನಿರ್ಬಂಧ
ಇರಾನ್ ಸಂಸತ್ತಿನ ರಾಷ್ಟ್ರೀಯ ಭದ್ರತಾ ಸಮಿತಿಯ ಮುಖ್ಯಸ್ಥ ಇಬ್ರಾಹಿಂ ಅಜೀಜಿ ಅವರು ‘ಎಕ್ಸ್’ (ಟ್ವಿಟರ್) ಮೂಲಕ ಈ ಯೋಜನೆಯನ್ನು ಹಂಚಿಕೊಂಡಿದ್ದಾರೆ.
“ಇರಾನ್ ತನ್ನ ರಾಷ್ಟ್ರೀಯ ಸಾರ್ವಭೌಮತ್ವ ಮತ್ತು ಅಂತರರಾಷ್ಟ್ರೀಯ ವ್ಯಾಪಾರ ಭದ್ರತೆಯ ಗ್ಯಾರಂಟಿ ಅಡಿಯಲ್ಲಿ ಸ್ಟ್ರೇಟ್ ಆಫ್ ಹೊರ್ಮುಜ್ನಲ್ಲಿ ಸಂಚಾರ ನಿರ್ವಹಣೆಗಾಗಿ ವೃತ್ತಿಪರ ವ್ಯವಸ್ಥೆಯನ್ನು ಸಿದ್ಧಪಡಿಸಿದೆ. ಇದನ್ನು ಶೀಘ್ರದಲ್ಲೇ ಸಾರ್ವಜನಿಕಗೊಳಿಸಲಾಗುವುದು. ಈ ಪ್ರಕ್ರಿಯೆಯಿಂದ ಕೇವಲ ವಾಣಿಜ್ಯ ಹಡಗುಗಳು ಮತ್ತು ಇರಾನ್ನೊಂದಿಗೆ ಸಹಕರಿಸುವ ಪಕ್ಷಗಳು ಮಾತ್ರ ಪ್ರಯೋಜನ ಪಡೆಯಲಿವೆ” ಎಂದು ಅವರು ಬರೆದಿದ್ದಾರೆ.
ಅಲ್ಲದೆ, ಇರಾನ್ ನ ಈ ಹೊಸ ವ್ಯವಸ್ಥೆಯು “ಫ್ರೀಡಂ ಪ್ರಾಜೆಕ್ಟ್” (Freedom Project) ಗೆ ಸಂಬಂಧಿಸಿದ ಜನರಿಗೆ ಅಥವಾ ಅದರ ನಿರ್ವಾಹಕರಿಗೆ ಲಭ್ಯವಿರುವುದಿಲ್ಲ ಮತ್ತು ಅವರಿಗೆ ಈ ಮಾರ್ಗವನ್ನು ಮುಚ್ಚಲಾಗುವುದು ಎಂದು ಇರಾನ್ ಸ್ಪಷ್ಟಪಡಿಸಿದೆ. (ಏಜೆನ್ಸಿಸ್)
