ನವದೆಹಲಿ : ಸ್ಟೆರೈಲ್ (ಸೋಂಕುರಹಿತ) ಔಷಧಗಳ ಉತ್ಪಾದನೆಯಲ್ಲಿ ಗುಣಮಟ್ಟ ಮತ್ತು ಸುರಕ್ಷತಾ ಮಾನದಂಡಗಳನ್ನು ಬಲಪಡಿಸುವ ಉದ್ದೇಶದಿಂದ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯವು ‘ಡ್ರಗ್ಸ್ ರೂಲ್ಸ್, 1945’ರ 'Schedule M'ಗೆ ತಿದ್ದುಪಡಿ ತರಲು ಪ್ರಸ್ತಾವನೆ ಸಲ್ಲಿಸಿದೆ. ಇದರ ಪ್ರಕಾರ, 'Grade A' ಕ್ಲೀನ್ ಏರಿಯಾದಲ್ಲಿ ಸೂಕ್ಷ್ಮಜೀವಿಗಳ ಸೋಂಕಿನ ನಿಗದಿತ ಮಿತಿಯನ್ನು ವಿಶ್ವ ಆರೋಗ್ಯ ಸಂಸ್ಥೆಯ (WHO) ಮಾರ್ಗಸೂಚಿಗಳಿಗೆ ಅನುಗುಣವಾಗಿ ಮಾರ್ಪಡಿಸಲಾಗುವುದು.ಆರೋಗ್ಯ ಸಚಿವಾಲಯವು ಅಕ್ಟೋಬರ್ 28, 2026 ರಂದು ಹೊರಡಿಸಿದ ಅಧಿಸೂಚನೆ (G.S.R. 953(E)) ಮೂಲಕ ಈ ಪ್ರಸ್ತಾವನೆಯನ್ನು ಮುಂದಿಟ್ಟಿದೆ. 'Schedule M' ನಲ್ಲಿ ಪ್ರಸ್ತುತ ಇರುವ ಸೂಕ್ಷ್ಮಜೀವಿ ಕಲುಷಿತಗೊಳ್ಳುವಿಕೆಯ (Microbial Contamination) ಮಿತಿ ಹಾಗೂ ಡಬ್ಲ್ಯೂಎಚ್‌ಒ ಮಾನದಂಡಗಳ ನಡುವಿನ ವ್ಯತ್ಯಾಸವನ್ನು ಸರಿಪಡಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.ಸ್ಟೆರೈಲ್ ಔಷಧಗಳ ತಯಾರಿಕೆಯಲ್ಲಿ 'Grade A' ಪ್ರದೇಶಗಳು ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತವೆ. ಮುಕ್ತವಾಗಿಟ್ಟ ಔಷಧಗಳು, ಕಂಟೇನರ್‌ಗಳು ಮತ್ತು ಸ್ಟೆರಿಲೈಸ್ ಮಾಡಿದ ಉಪಕರಣಗಳನ್ನು ಈ ಪ್ರದೇಶದಲ್ಲೇ ನಿರ್ವಹಿಸಲಾಗುತ್ತದೆ. ಹೀಗಾಗಿ ಔಷಧಗಳ ಗುಣಮಟ್ಟ ಮತ್ತು ಸುರಕ್ಷತೆಯನ್ನು ಕಾಯ್ದುಕೊಳ್ಳಲು ಇಲ್ಲಿ ಸೂಕ್ಷ್ಮಜೀವಿಗಳ ಮೇಲೆ ಕಟ್ಟುನಿಟ್ಟಿನ ನಿಯಂತ್ರಣ ಅಗತ್ಯವಾಗಿದೆ.ಪ್ರಸ್ತಾವಿತ ತಿದ್ದುಪಡಿಯ ಪ್ರಕಾರ, 'Grade A' ಪ್ರದೇಶಗಳಲ್ಲಿ ಯಾವುದೇ ರೀತಿಯ ಸೂಕ್ಷ್ಮಜೀವಿಗಳ ಬೆಳವಣಿಗೆ ಕಂಡುಬಂದರೂ ತಕ್ಷಣವೇ ತನಿಖೆ ನಡೆಸುವುದು ಕಡ್ಡಾಯವಾಗಲಿದೆ. ಇದರಿಂದ ದೇಶದಲ್ಲಿ ಸ್ಟೆರೈಲ್ ಔಷಧ ಉತ್ಪಾದನೆಯ ನಿಯಂತ್ರಣ ವ್ಯವಸ್ಥೆ ಬಲಗೊಳ್ಳಲಿದ್ದು, ಅಂತರರಾಷ್ಟ್ರೀಯ ಮಾನದಂಡಗಳಿಗೆ ತಕ್ಕಂತೆ ರೂಪಿಸಲು ನೆರವಾಗಲಿದೆ.ಈ ಪ್ರಸ್ತಾವಿತ ತಿದ್ದುಪಡಿಗೆ ಸಂಬಂಧಿಸಿದಂತೆ ಆರೋಗ್ಯ ಸಚಿವಾಲಯವು ಸಾರ್ವಜನಿಕರು ಮತ್ತು ಸಂಬಂಧಪಟ್ಟ ಪಾಲುದಾರರಿಂದ ಆಕ್ಷೇಪಣೆ ಹಾಗೂ ಸಲಹೆಗಳನ್ನು ಆಹ್ವಾನಿಸಿದೆ. ಆಸಕ್ತರು ತಮ್ಮ ಅಭಿಪ್ರಾಯಗಳನ್ನು ಅವರ ಕಾರ್ಯದರ್ಶಿ (ಔಷಧ ನಿಯಂತ್ರಣ), ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ, ಭಾರತ ಸರ್ಕಾರ, U-6, ವರ್ಕ್ ಹಾಲ್, ಸಿ ವಿಂಗ್, ಮೊದಲನೇ ಮಹಡಿ, ಕರ್ತವ್ಯ ಭವನ-1, ನವದೆಹಲಿ-110001 ಈ ವಿಳಾಸಕ್ಕೆ ಕಳುಹಿಸಬಹುದು. ಅಥವಾ drugsdiv-mohfw@gov.in ಇಮೇಲ್ ವಿಳಾಸಕ್ಕೂ ಕಳುಹಿಸಿಕೊಡಬಹುದು ಎಂದು ಮಾಧ್ಯಮವೊಂದು ವರದಿ ಮಾಡಿದೆ.