ನವದೆಹಲಿ : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟೂರ್ನಿಯಲ್ಲಿ ಸತತವಾಗಿ 200ಕ್ಕೂ ಹೆಚ್ಚು ರನ್ಗಳು ದಾಖಲಾಗುತ್ತಿರುವ ಈ ಸಂದರ್ಭದಲ್ಲಿ ಬೌಲರ್ ಗಳು ಪ್ರಭಾವಶಾಲಿಯಾಗಿ ಉಳಿಯುವುದು ಅತ್ಯಂತ ಕಷ್ಟಕರವಾಗುತ್ತಿದೆ ಎಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ನಾಯಕ ರಜತ್ ಪಾಟೀದಾರ್ ಒಪ್ಪಿಕೊಂಡಿದ್ದಾರೆ. ಇದೇ ವೇಳೆ ಐಪಿಎಲ್ ಫೈನಲ್ ಪಂದ್ಯವನ್ನು ಬೆಂಗಳೂರಿನಿಂದ ಅಹಮದಾಬಾದ್ಗೆ ಸ್ಥಳಾಂತರಿಸಿದ ವಿವಾದದ ಕುರಿತು ನೇರ ಪ್ರತಿಕ್ರಿಯೆ ನೀಡಲು ಅವರು ನಿರಾಕರಿಸಿದ್ದಾರೆ.
ಮಂಗಳವಾರ ಗುಜರಾತ್ ಟೈಟಾನ್ಸ್ ವಿರುದ್ಧ ನಡೆಯಲಿರುವ ಮೊದಲ ಕ್ವಾಲಿಫೈಯರ್ ಪಂದ್ಯದ ಮುನ್ನಾದಿನದಂದು ಮಾಧ್ಯಮಗಳೊಂದಿಗೆ ಮಾತನಾಡಿದ ಪಾಟೀದಾರ್, “ಈಗ 220 ರಿಂದ 250 ರನ್ಗಳ ಸ್ಕೋರ್ ಕೂಡ ಸುರಕ್ಷಿತವಲ್ಲದ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದು ವಿಶೇಷವಾಗಿ ವೇಗದ ಬೌಲರ್ ಗಳಿಗೆ ತಲೆನೋವಾಗಿ ಪರಿಣಮಿಸಿದೆ” ಎಂದಿದ್ದಾರೆ.
“ಬೌಲರ್ಗಳಿಗೆ ಸವಾಲುಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇವೆ. ಪಿಚ್ ಗಳು ಬ್ಯಾಟಿಂಗ್ ಗೆ ಪೂರಕವಾಗಿವೆ, ಮೈದಾನದ ಬೌಂಡರಿಗಳು ಚಿಕ್ಕದಾಗಿವೆ ಮತ್ತು ಇಬ್ಬನಿ (ಡ್ಯೂ ಫ್ಯಾಕ್ಟರ್) ಕೂಡ ಪ್ರಮುಖ ಪಾತ್ರ ವಹಿಸುತ್ತಿದೆ. ಅದರಲ್ಲೂ ವೇಗದ ಬೌಲರ್ಗಳು ಮಾಡುವ ಸಣ್ಣ ತಪ್ಪೂ ಸಹ ಸಿಕ್ಸರ್ ಆಗಿ ಬದಲಾಗುತ್ತಿದೆ. ಆದಾಗ್ಯೂ, ನಮಗೆ ಎಂತಹದ್ದೇ ಪಿಚ್ ಮತ್ತು ಪರಿಸ್ಥಿತಿ ಸಿಕ್ಕರೂ ಅದರಲ್ಲಿ ನಮ್ಮ ಅತ್ಯುತ್ತಮ ಪ್ರದರ್ಶನ ನೀಡಲು ಪ್ರಯತ್ನಿಸುತ್ತೇವೆ. ಪಿಚ್ ಹೇಗಿರಬೇಕು ಎಂಬುದನ್ನು ನಿರ್ಧರಿಸುವುದು ನಮ್ಮ ಕೈಯಲ್ಲಿಲ್ಲ” ಎಂದು ಪಾಟೀದಾರ್ ಹೇಳಿದ್ದಾರೆ.
ಫೈನಲ್ ಸ್ಥಳಾಂತರ ವಿವಾದಕ್ಕೆ ರಾಜತಾಂತ್ರಿಕ ಉತ್ತರ
ಐಪಿಎಲ್ ಫೈನಲ್ ಪಂದ್ಯವನ್ನು ಬೆಂಗಳೂರಿನಿಂದ ಅಹಮದಾಬಾದ್ಗೆ ಸ್ಥಳಾಂತರಿಸಿರುವ ಕುರಿತು ಕೇಳಲಾದ ಪ್ರಶ್ನೆಗೆ ಪಾಟೀದಾರ್ ಸಮತೋಲಿತ ಉತ್ತರ ನೀಡಿದರು. “ಇದು ನನ್ನ ನಿಯಂತ್ರಣದಲ್ಲಿಲ್ಲದ ವಿಷಯ. ಅಹಮದಾಬಾದ್ ಒಂದು ಐತಿಹಾಸಿಕ ಕ್ರೀಡಾಂಗಣವಾಗಿದೆ, ಆದ್ದರಿಂದ ಫೈನಲ್ ಎಲ್ಲೇ ನಡೆದರೂ ಅಲ್ಲಿ ಪಂದ್ಯ ಆಡಬೇಕಾಗುತ್ತದೆ. ಸದ್ಯಕ್ಕೆ ನಮ್ಮ ಸಂಪೂರ್ಣ ಗಮನ ಫೈನಲ್ ತಲುಪುವುದರ ಮೇಲಿದೆ” ಎಂದಿದ್ದಾರೆ.
ಕಾರ್ಯನಿರ್ವಹಣೆಯ ಕಾರಣಗಳು, ಸ್ಥಳೀಯ ರಾಜಕೀಯ ಪರಿಸ್ಥಿತಿಗಳು, ಟಿಕೆಟ್ಗಳ ಭಾರಿ ಬೇಡಿಕೆ ಮತ್ತು ಜನಸಂದಣಿ ನಿರ್ವಹಣೆಯ ಕಳಕಳಿಯನ್ನು ಗಮನದಲ್ಲಿಟ್ಟುಕೊಂಡು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಪ್ರಶಸ್ತಿ ಸುತ್ತಿನ ಪಂದ್ಯವನ್ನು ಅಹಮದಾಬಾದ್ನಲ್ಲಿ ನಡೆಸಲು ನಿರ್ಧರಿಸಿದೆ.
ಎರಡು ಬಲಿಷ್ಠ ತಂಡಗಳ ನಡುವಿನ ಹಣಾಹಣಿ
ಲೀಗ್ ಹಂತದಲ್ಲಿ ಸಮಾನ ಅಂಕಗಳನ್ನು ಗಳಿಸಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಗುಜರಾತ್ ಟೈಟಾನ್ಸ್ ತಂಡಗಳು ಈಗ ನೇರವಾಗಿ ಫೈನಲ್ ಪ್ರವೇಶಿಸಲು ಪರಸ್ಪರ ಸೆಣಸಾಡಲಿವೆ. ಇದನ್ನು ಎರಡು ಸಮತೋಲಿತ ತಂಡಗಳ ನಡುವಿನ ರೋಚಕ ಪಂದ್ಯ ಎಂದು ಪಾಟೀದಾರ್ ಬಣ್ಣಿಸಿದ್ದಾರೆ. “ಎರಡೂ ತಂಡಗಳು ಇಡೀ ಟೂರ್ನಿಯಲ್ಲಿ ಅದ್ಭುತ ಪ್ರದರ್ಶನ ನೀಡಿವೆ. ಪಂದ್ಯದ ದಿನ ಯಾರು ತಮ್ಮ ಯೋಜನೆಗಳನ್ನು ಉತ್ತಮವಾಗಿ ಕಾರ್ಯಗತಗೊಳಿಸುತ್ತಾರೋ ಮತ್ತು ಒತ್ತಡದ ಸಮಯದಲ್ಲಿ ತಾಳ್ಮೆ ಹಾಗೂ ಏಕಾಗ್ರತೆಯನ್ನು ಕಾಯ್ದುಕೊಳ್ಳುತ್ತಾರೋ ಅವರೇ ಗೆಲುವು ಸಾಧಿಸುತ್ತಾರೆ” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಆಕ್ರಮಣಕಾರಿ ತಂತ್ರ ಬದಲಾಗಲ್ಲ
ಟೂರ್ನಿಯಲ್ಲಿ ಸತತವಾಗಿ ಬೃಹತ್ ಸ್ಕೋರ್ಗಳು ದಾಖಲಾಗುತ್ತಿದ್ದರೂ ಆರ್ಸಿಬಿ ತನ್ನ ಆಕ್ರಮಣಕಾರಿ ತಂತ್ರವನ್ನು ಬದಲಾಯಿಸುವುದಿಲ್ಲ ಎಂದು ಪಾಟೀದಾರ್ ಸ್ಪಷ್ಟಪಡಿಸಿದ್ದಾರೆ.
“ನಮ್ಮ ತಂಡದ ದೊಡ್ಡ ಶಕ್ತಿಯೇ ಬೌಲಿಂಗ್. ಪವರ್ಪ್ಲೇನಲ್ಲಿ ನಾವು ಹೇಗೆ ಬೌಲಿಂಗ್ ಮಾಡುತ್ತೇವೆ ಎಂಬುದು ಅತ್ಯಂತ ಪ್ರಮುಖವಾಗಿದೆ.”
“ನಾವು ಇಲ್ಲಿ ಕೇವಲ ರಕ್ಷಣಾತ್ಮಕವಾಗಿ ಆಡಲು ಬಂದಿಲ್ಲ, ಬದಲಿಗೆ ಆಕ್ರಮಣ ಮಾಡುವ ಮನಸ್ಥಿತಿಯೊಂದಿಗೆ ಬಂದಿದ್ದೇವೆ ಎಂಬುದು ತಂಡದ ಪ್ರತಿಯೊಬ್ಬ ಆಟಗಾರನಿಗೂ ತಿಳಿದಿದೆ.”
“ನಾವು ಆರಂಭಿಕ ವಿಕೆಟ್ಗಳನ್ನು ಪಡೆಯಲು ಪ್ರಯತ್ನಿಸುತ್ತೇವೆ ಮತ್ತು ಇದುವರೆಗೆ ಇದೇ ನಮ್ಮ ಯಶಸ್ಸಿನ ಮಂತ್ರವಾಗಿದೆ. ನಿರಂತರವಾಗಿ ಒಂದೇ ರೀತಿಯ ಚಿಂತನೆ ಮತ್ತು ತಂತ್ರವನ್ನು ಅನುಸರಿಸುವುದು ಪಂದ್ಯದಲ್ಲಿ ವ್ಯತ್ಯಾಸವನ್ನು ಉಂಟುಮಾಡುತ್ತದೆ.”
ಇದೇ ವೇಳೆ ಅವರು ಭುವನೇಶ್ವರ್ ಕುಮಾರ್, ಜೋಶ್ ಹ್ಯಾಜಲ್ವುಡ್ ಮತ್ತು ರಸಿಖ್ ಸಲಾಮ್ ಅವರ ವೇಗದ ಬೌಲಿಂಗ್ ತ್ರಿವಳಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದರು. ಇನ್ನು ಇಂಗ್ಲೆಂಡ್ ನಲ್ಲಿ ಬೆರಳಿನ ಚಿಕಿತ್ಸೆ ಮುಗಿಸಿ ಮರಳಿರುವ ಆರಂಭಿಕ ಆಟಗಾರ ಫಿಲ್ ಸಾಲ್ಟ್ ಲಭ್ಯತೆಯ ಬಗ್ಗೆ ಕೇಳಲಾದ ಪ್ರಶ್ನೆಗೆ ಉತ್ತರಿಸಿದ ಪಾಟೀದಾರ್, “ಅವರು ಫಿಟ್ ಆಗಿದ್ದಾರೆ ಮತ್ತು ಅಭ್ಯಾಸ ನಡೆಸುತ್ತಿದ್ದಾರೆ, ಆದರೆ ನಾವು ಇನ್ನು ಅಂತಿಮ ಹನ್ನೊಂದರ ಬಳಗವನ್ನು (Playing XI) ನಿರ್ಧರಿಸಿಲ್ಲ” ಎಂದು ಸಸ್ಪೆನ್ಸ್ ಕಾಯ್ದುಕೊಂಡಿದ್ದಾರೆ. (ಏಜೆನ್ಸಿಸ್)
