ಬೆಂಗಳೂರು: ಸಾಮಾಜಿಕ ಜಾಲತಾಣದ ಜಾಹೀರಾತು ನೋಡಿ ಆನ್‌ಲೈನ್‌ ಮೂಲಕ ವಸ್ತುಗಳ ಖರೀದಿಗೂ ಮೊದಲು ಎಚ್ಚರ.. ಯುಟ್ಯೂಬ್‌ ಚಾನಲ್‌ವೊಂದರ ಜಾಹೀರಾತು ನೋಡಿ ಆನ್‌ಲೈನ್‌ ಮೂಲಕ ಸೀರೆ ಖರೀದಿಸಲು ಮುಂದಾಗಿ ಮಹಿಳಾ ಐಎಎಸ್‌ ಅಧಿಕಾರಿಯೊಬ್ಬರು ವಂಚನೆಗೊಳಗಾಗಿದ್ದಾರೆ.
ರಾಜ್ಯದ ಸಕಾಲ ಮಿಷನ್‌ ನಿರ್ದೇಶಕಿ ಪಲ್ಲವಿ ಅಕು ರಾತಿ ವಂಚನೆಗೊಳಗಾದ ಐಎಎಸ್‌ ಅಧಿಕಾರಿ. ಅವರು ನೀಡಿದ ದೂರಿನ ಮೇರೆಗೆ ಪೂರ್ವ ವಿಭಾಗದ ಸೈಬರ್‌ ಕ್ರೈಂ ಠಾಣೆ ಪೊಲೀಸರು ಮಾಹಿತಿ ತಂತ್ರಜ್ಞಾನ ಕಾಯ್ದೆಯಡಿ ಪ್ರಕರಣ ದಾಖಲಿಸಿದ್ದಾರೆ.
ಏನಿದು ಪ್ರಕರಣ?:
ಕಳೆದ ತಿಂಗಳು ಪೂರ್ಣಿಮಾ ಕಲೆಕ್ಷನ್‌ ಎಂಬ ಯುಟ್ಯೂಬ್‌ ಚಾನೆಲ್‌ನಲ್ಲಿ ತಮಿಳು ನಾಡಿನ ಮದುರೈ ಸುಂಗುಡಿ ಕಾಟನ್‌ ಸೀರೆ ಬಗ್ಗೆ ಜಾಹೀರಾತು ಕಂಡು ಬಂದಿದೆ. ಈ ಸೀರೆ ಖರೀದಿಸುವ ಉದ್ದೇಶದಿಂದ ಪಲ್ಲವಿ ಅಕುರಾತಿ ಅವರು ಈ ಸೀರೆಯ ಸ್ಕ್ರೀನ್‌ ಶಾಟ್‌ ಫೋಟೋ ತೆಗೆದು ಪೂರ್ಣಿಮಾ ಕಲೆಕ್ಷನ್‌ನ ವಾಟ್ಸ್‌ ಆ್ಯಪ್‌ ನಂಬರ್‌ಗೆ ಕಳುಹಿಸಿ, ನಂತರ ಆನ್‌ಲೈನ್‌ ಮೂಲಕ ಮಾರ್ಚ್‌ 10ರಂದು 850 ರೂ. ಪಾವತಿಸಿದ್ದಾರೆ. ಆದರೆ, ಒಂದು ತಿಂಗಳು ಕಳೆದರೂ ಸೀರೆ ಡೆಲಿವರಿ ಮಾಡಿಲ್ಲ. ಈ ಸಂಬಂಧ ವಿಚಾರಿಸಲು ಕರೆ ಮಾಡಿ ದರೂ ಪ್ರತಿಕ್ರಿಯಿಸಿಲ್ಲ. ಸಂದೇಶ ಕಳುಹಿಸಿದರೂ ಪ್ರಯೋಜನವಾಗಿಲ್ಲ. ಹೀಗಾಗಿ ಪಲ್ಲವಿ ಅಕುರಾತಿ ಅವರು ಈ ಸಂಬಂಧ ಸೈಬರ್‌ ಕ್ರೈಂ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ.
