ಕರ್ನಾಟಕದ ಅಭಿವೃದ್ಧಿ ಪಯಣಕ್ಕೆ ಹೊಸ ವೇಗ; ಮಧ್ಯಮ ವರ್ಗವನ್ನು ಆರ್ಥಿಕ ಪ್ರಗತಿಯ ಪಾಲುದಾರರನ್ನಾಗಿಸಲಾಗುವುದು : ಪ್ರಧಾನಿ ಮೋದಿ

ಬೆಂಗಳೂರು : ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಶುಕ್ರವಾರ ಬೆಂಗಳೂರಿನಲ್ಲಿ ಸಂಪರ್ಕ (ಕನೆಕ್ಟಿವಿಟಿ) ಮತ್ತು ಇಂಧನ ಭದ್ರತೆಗೆ ಸಂಬಂಧಿಸಿದ ₹15,000 ಕೋಟಿಗೂ ಅಧಿಕ ಮೊತ್ತದ ಅಭಿವೃದ್ಧಿ ಯೋಜನೆಗಳ ಉದ್ಘಾಟನೆ ಹಾಗೂ ಶಂಕುಸ್ಥಾಪನೆ ನೆರವೇರಿಸಿದರು. ಈ ಸಂದರ್ಭದಲ್ಲಿ ಬೃಹತ್ ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ಈ ಯೋಜನೆಗಳು ಕರ್ನಾಟಕದ ಅಭಿವೃದ್ಧಿ ಪಯಣಕ್ಕೆ ಹೊಸ ವೇಗ ನೀಡಲಿವೆ ಮತ್ತು 'ವಿಕಸಿತ ಭಾರತ'ದ ನಿರ್ಮಾಣಕ್ಕೆ ಮಹತ್ವದ ಕೊಡುಗೆ ನೀಡಲಿವೆ ಎಂದು ಹೇಳಿದರು.ರಾಜ್ಯಪಾಲರಾದ ಸುಧಾ ಯಾದವ್ ಅವರಿಗೆ ಪ್ರಶಂಸೆ ರಾಜ್ಯಪಾಲರಾದ ಸುಧಾ ಯಾದವ್ ಅವರನ್ನು ಸ್ಮರಿಸಿದ ಪ್ರಧಾನಿ ಮೋದಿ, ಕಾರ್ಗಿಲ್ ಯುದ್ಧದಲ್ಲಿ ಅವರ ಪತಿ ದೇಶಕ್ಕಾಗಿ ಸರ್ವೋಚ್ಚ ಬಲಿದಾನ ಮಾಡಿದ್ದಾರೆ. ಆ ಬಳಿಕವೂ ಅವರು ಭಾರತ ಮಾತೆಯ ಸೇವೆಯ ಪ್ರತಿಜ್ಞೆಯನ್ನು ನಿಭಾಯಿಸಿಕೊಂಡು ಬಂದಿದ್ದು, ಸಂಸತ್ತಿನಿಂದ ಹಿಡಿದು ಈಗ ಕರ್ನಾಟಕದವರೆಗೆ ಸೇವಾ ಮನೋಭಾವದಿಂದ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಶ್ಲಾಘಿಸಿ ಶುಭ ಹಾರೈಸಿದರು.ಮೆಟ್ರೋ ಜಾಲದಲ್ಲಿ 'ಶತಕ'ದ ಸಾಧನೆ 2014ರಲ್ಲಿ ಬೆಂಗಳೂರಿನ ಮೆಟ್ರೋ ಜಾಲ ಕೇವಲ 14 ಕಿಲೋಮೀಟರ್‌ಗಳಷ್ಟಿತ್ತು, ಆದರೆ ಇಂದು ಅದು 100 ಕಿಲೋಮೀಟರ್ ಗಡಿ ದಾಟಿದೆ ಎಂದು ಪ್ರಧಾನಿ ತಿಳಿಸಿದರು. ದೆಹಲಿ-ಎನ್‌ಸಿಆರ್ ಮತ್ತು ಮುಂಬೈ ನಂತರ ಮೆಟ್ರೋ ಜಾಲದಲ್ಲಿ 100 ಕಿ.ಮೀ ಮೈಲಿಗಲ್ಲು ದಾಟಿದ ದೇಶದ ಮೂರನೇ ನಗರ ಕೇಂದ್ರವಾಗಿ ಬೆಂಗಳೂರು ಹೊರಹೊಮ್ಮಿದೆ. ಇದು 'ಸುಗಮ ಜೀವನ' (ಈಸ್ ಆಫ್ ಲಿವಿಂಗ್) ಮತ್ತು 'ಸುಗಮ ಪ್ರಯಾಣ'ದ (ಈಸ್ ಆಫ್ ಟ್ರಾವೆಲ್) ಹೊಸ ಚಿಂತನೆಯ ಫಲವಾಗಿದೆ ಎಂದು ಅವರು ಬಣ್ಣಿಸಿದರು.ವಂದೇ ಭಾರತ್ ಮತ್ತು ಇಂಧನ ಭದ್ರತೆಗೆ ಒತ್ತು  ಇತ್ತೀಚೆಗಷ್ಟೇ ಕರ್ನಾಟಕಕ್ಕೆ ರಾಜ್ಯದ ಮೊದಲ ವಂದೇ ಭಾರತ್ ಸ್ಲೀಪರ್ ರೈಲು ಸಿಕ್ಕಿದ್ದು, ಇದೀಗ ಗೋವಾಕ್ಕೆ ಸಂಪರ್ಕ ಕಲ್ಪಿಸುವ ವಂದೇ ಭಾರತ್ ರೈಲು ಕೂಡ ದೊರೆತಿದೆ. ಇದರಿಂದ ಕರಾವಳಿ ಮಾರ್ಗದ ಪ್ರಯಾಣಿಕರಿಗೆ ಸೆಮಿ-ಹೈಸ್ಪೀಡ್ ರೈಲು ಪ್ರಯಾಣದ ಅನುಭವ ಸಿಗಲಿದೆ ಎಂದು ಮೋದಿ ಹೇಳಿದರು. ಇರಾನ್ ಮತ್ತು ಗಲ್ಫ್ ರಾಷ್ಟ್ರಗಳ ಸುತ್ತಮುತ್ತಲಿನ ಉದ್ವಿಗ್ನತೆಯು ಇಂಧನ ಭದ್ರತೆಯ ಅಗತ್ಯವನ್ನು ಒತ್ತಿಹೇಳಿದೆ ಎಂದ ಪ್ರಧಾನಿ, ಕಳೆದ ಒಂದು ದಶಕದಲ್ಲಿ ಪೆಟ್ರೋಲ್-ಡೀಸೆಲ್-ಎಲ್‌ಪಿಜಿ ಉತ್ಪಾದನೆ ಹೆಚ್ಚಳ, ಕಚ್ಚಾ ತೈಲ ಸಂಗ್ರಹಣೆ, ಸೌರ-ಜಲ-ಪವನ ವಿದ್ಯುತ್ ವಿಸ್ತರಣೆ ಮತ್ತು ರೈಲ್ವೆಯ ಬಹುತೇಕ ಶೇ. 100ರಷ್ಟು ವಿದ್ಯುದ್ದೀಕರಣದಂತಹ ಕ್ರಮಗಳು ಬಿಕ್ಕಟ್ಟನ್ನು ಸಮರ್ಥವಾಗಿ ಎದುರಿಸಲು ಭಾರತಕ್ಕೆ ನೆರವಾಗಿವೆ ಎಂದರು.ಮಧ್ಯಮ ವರ್ಗವನ್ನು ಆರ್ಥಿಕ ಪಾಲುದಾರರನ್ನಾಗಿಸುವ ಗುರಿ  ಭಾರತದ ನವೀಕರಿಸಬಹುದಾದ ಇಂಧನ (ರಿನ್ಯೂವಬಲ್ ಎನರ್ಜಿ) ಸಾಮರ್ಥ್ಯವು ಈಗ 300 ಗಿಗಾವ್ಯಾಟ್‌ಗಳನ್ನು ದಾಟಿದೆ. ನಾಗರಿಕರು ಈಗ ಕೇವಲ ವಿದ್ಯುತ್ ಗ್ರಾಹಕರಾಗಿ ಉಳಿಯದೆ, ಉತ್ಪಾದಕರೂ ಆಗುತ್ತಿದ್ದಾರೆ. ಮಧ್ಯಮ ವರ್ಗದವರ ಉಳಿತಾಯ ಹೆಚ್ಚಾಗಬೇಕು, ಅವರ ಖರೀದಿ ಸಾಮರ್ಥ್ಯ ಬಲಗೊಳ್ಳಬೇಕು ಮತ್ತು ತಮ್ಮ ಕುಟುಂಬದ ಕನಸುಗಳ ಜೊತೆಗೆ ದೇಶದ ಆರ್ಥಿಕ ಪ್ರಗತಿಯಲ್ಲೂ ಅವರು ಪಾಲುದಾರರಾಗಬೇಕು ಎಂಬುದು ಸರ್ಕಾರದ ಪ್ರಯತ್ನವಾಗಿದೆ ಎಂದು ಪ್ರಧಾನಿ ತಿಳಿಸಿದರು.ಹೊಸ ಯೋಜನೆಗಳಿಗಾಗಿ ರಾಜ್ಯದ ಜನತೆಗೆ ಶುಭಾಶಯ ಕೋರಿದ ಅವರು, ಇವು 'ವಿಕಸಿತ ಕರ್ನಾಟಕ' ಮತ್ತು 'ವಿಕಸಿತ ಭಾರತ'ದ ನಿರ್ಮಾಣಕ್ಕೆ ಹೊಸ ಚೈತನ್ಯ ನೀಡಲಿವೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.