ಮುಂಬೈ: ಎರಡು ದಶಕಗಳ ಸುದೀರ್ಘ ಅಂತರದ ನಂತರ ಭಾರತವು ಜಾಗತಿಕ ಹಣಕಾಸು ವಲಯದ ಪ್ರತಿಷ್ಠಿತ ಕಾರ್ಯಕ್ರಮವಾದ ‘ವರ್ಲ್ಡ್ ಫೆಡರೇಶನ್ ಆಫ್ ಎಕ್ಸ್‌ಚೇಂಜ್ಸ್’ (WFE) ನ 65ನೇ ಸಾಮಾನ್ಯ ಸಭೆ ಮತ್ತು ವಾರ್ಷಿಕ ಸಮಾವೇಶದ ಆತಿಥ್ಯ ವಹಿಸಿದೆ. ನವೆಂಬರ್ 17 ರಿಂದ 19, 2026 ರವರೆಗೆ ಮುಂಬೈನಲ್ಲಿ ನ್ಯಾಷನಲ್ ಸ್ಟಾಕ್ ಎಕ್ಸ್‌ಚೇಂಜ್ ಆಫ್ ಇಂಡಿಯಾ (NSE) ಆಯೋಜಿಸಿರುವ ಈ ಸಮಾವೇಶವನ್ನು ಉದ್ದೇಶಿಸಿ ಪ್ರಧಾನಿ ನರೇಂದ್ರ ಮೋದಿ ವಿಶೇಷ ಸಂದೇಶ ನೀಡಿದ್ದಾರೆ. ಭಾರತವು ಇಂದು ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಗಳಲ್ಲಿ ಒಂದಾಗಿದ್ದು, ದೇಶದ ಬಂಡವಾಳ ಮಾರುಕಟ್ಟೆಯು (ಕ್ಯಾಪಿಟಲ್ ಮಾರ್ಕೆಟ್) ಅಭೂತಪೂರ್ವ ವೇಗದಲ್ಲಿ ಮುನ್ನಡೆಯುತ್ತಿದೆ ಎಂದು ಅವರು ಹೇಳಿದ್ದಾರೆ.ಆಯೋಜಕರಾದ ಎನ್‌ಎಸ್‌ಇ ಮತ್ತು ಡಬ್ಲ್ಯೂಎಫ್‌ಇಗೆ ಅಭಿನಂದನೆ ಸಲ್ಲಿಸಿರುವ ಪ್ರಧಾನಿ ಮೋದಿ, ಬಂಡವಾಳ ಮಾರುಕಟ್ಟೆಯ ವಿಸ್ತರಣೆಯಿಂದಾಗಿ ಕಂಪನಿಗಳಿಗೆ ಬಂಡವಾಳ ಸಂಗ್ರಹಿಸಲು ಮತ್ತು ತಮ್ಮ ವಹಿವಾಟನ್ನು ವೃದ್ಧಿಸಿಕೊಳ್ಳಲು ಹೊಸ ಅವಕಾಶಗಳು ಲಭ್ಯವಾಗಿವೆ ಎಂದು ತಮ್ಮ ಲಿಖಿತ ಸಂದೇಶದಲ್ಲಿ ತಿಳಿಸಿದ್ದಾರೆ. ಮ್ಯೂಚುವಲ್ ಫಂಡ್‌ಗಳ ಮೂಲಕ ಆಗುತ್ತಿರುವ ದಾಖಲೆಯ ಹೂಡಿಕೆಯ ಬಗ್ಗೆ ಸಂತಸ ವ್ಯಕ್ತಪಡಿಸಿದ ಅವರು, ಇಂದು ಹೆಚ್ಚಿನ ಸಂಖ್ಯೆಯಲ್ಲಿ ಸಾಮಾನ್ಯ ನಾಗರಿಕರು ಮಾರುಕಟ್ಟೆಯೊಂದಿಗೆ ಕೈಜೋಡಿಸುತ್ತಿದ್ದು, ಈ ಮೂಲಕ ದೇಶದ ಅಭಿವೃದ್ಧಿ ಪಯಣದಲ್ಲಿ ನೇರ ಪಾಲುದಾರರಾಗುತ್ತಿದ್ದಾರೆ ಎಂದರು. ಹಣಕಾಸು ಜಗತ್ತಿನಲ್ಲಿ ಆಗುತ್ತಿರುವ ತಾಂತ್ರಿಕ ಬದಲಾವಣೆಗಳ ಕುರಿತು ಮಾತನಾಡಿದ ಪ್ರಧಾನಿ, ಕೃತಕ ಬುದ್ಧಿಮತ್ತೆ (AI) ಮತ್ತು ಹೊಸ ತಂತ್ರಜ್ಞಾನಗಳು ಮಾರುಕಟ್ಟೆಯ ಕಾರ್ಯವೈಖರಿಯನ್ನು ವೇಗವಾಗಿ ಬದಲಾಯಿಸುತ್ತಿವೆ ಎಂದರು. ಆದರೆ, ಇದರೊಂದಿಗೆ ಸೈಬರ್ ಭದ್ರತೆ, ಮಾರುಕಟ್ಟೆಯ ಪಾರದರ್ಶಕತೆ ಮತ್ತು ಹೂಡಿಕೆದಾರರ ಸುರಕ್ಷತೆಯಂತಹ ಹೊಸ ಸವಾಲುಗಳೂ ಎದುರಾಗಿವೆ. ಮಾರುಕಟ್ಟೆಗಳು ಎಷ್ಟು ವೇಗವಾಗಿ ಮುನ್ನಡೆಯಬೇಕು ಎಂಬುದನ್ನು ತಂತ್ರಜ್ಞಾನ ನಿರ್ಧರಿಸಬಹುದಾದರೂ, ಇಡೀ ಹಣಕಾಸು ವ್ಯವಸ್ಥೆಯ ಬೆಳವಣಿಗೆಯಲ್ಲಿ ‘ನಂಬಿಕೆ’ಯೇ ಯಾವಾಗಲೂ ಅತ್ಯಂತ ಮಹತ್ವದ ಅಡಿಪಾಯವಾಗಿ ಉಳಿಯಲಿದೆ ಎಂದು   ಸ್ಪಷ್ಟಪಡಿಸಿದರು.