ನವದೆಹಲಿ : ದೋಹಾದಲ್ಲಿ ನಡೆಯುತ್ತಿರುವ ಐಎಸ್‌ಎಸ್‌ಎಫ್ (ISSF) ವಿಶ್ವ ಶೂಟಿಂಗ್ ಚಾಂಪಿಯನ್‌ ಷಿಪ್‌ ನ ಪುರುಷರ 50 ಮೀಟರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಭಾರತದ ರವೀಂದರ್ ಸಿಂಗ್, ಸೌರಭ್ ಚೌಧರಿ ಹಾಗೂ ಅಮನ್‌ಪ್ರೀತ್ ಸಿಂಗ್ ಅವರನ್ನೊಳಗೊಂಡ ತಂಡವು ಅಮೋಘ ಸಾಧನೆ ಮಾಡಿ ಚಿನ್ನದ ಪದಕಕ್ಕೆ ಮುತ್ತಿಕ್ಕಿದೆ.ಭಾರತೀಯ ತ್ರಿವಳಿ ಶೂಟರ್‌ಗಳ ತಂಡವು ಒಟ್ಟಾರೆಯಾಗಿ 1659 ಅಂಕಗಳನ್ನು ಗಳಿಸಿ ಅಗ್ರಸ್ಥಾನ ಪಡೆಯಿತು. ಭಾರತದ ರವೀಂದರ್ ಸಿಂಗ್ 559 ಅಂಕ ಗಳಿಸಿ ತಂಡದ ಪರ ಗರಿಷ್ಠ ಸಾಧನೆ ಮಾಡಿದರೆ, ಪ್ರಸಿದ್ಧ ಶೂಟರ್ ಸೌರಭ್ ಚೌಧರಿ 551 ಹಾಗೂ ಅಮನ್‌ಪ್ರೀತ್ ಸಿಂಗ್ 549 ಅಂಕಗಳನ್ನು ಕೊಡುಗೆಯಾಗಿ ನೀಡಿದರು.ಈ ವಿಭಾಗದಲ್ಲಿ ಚೀನಾದ ಝಾಂಗ್ ಬೊಂಗ್ಚೆನ್, ಲ್ಯು ಜುನಿ ಮತ್ತು ಫೆಂಗ್ ಲಿನ್ಲಾಂಗ್ (1648 ಅಂಕಗಳು) ಬೆಳ್ಳಿ ಪದಕ ಪಡೆದರೆ, ದಕ್ಷಿಣ ಕೊರಿಯಾದ ಹಾಂಗ್ ಸುಹಿಯೊನ್, ಚೋ ಬೊರಾಮ್ ಮತ್ತು ಸೋ ಸೆಯುಂಗ್ ಸೊಬ್ (1643 ಅಂಕಗಳು) ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡರು.ವೈಯಕ್ತಿಕ ವಿಭಾಗದಲ್ಲಿ ರವೀಂದರ್‌ಗೆ ಬೆಳ್ಳಿ:ತಂಡದ ಚಿನ್ನದ ಜೊತೆಗೆ ವೈಯಕ್ತಿಕ ವಿಭಾಗದಲ್ಲೂ ಅದ್ಭುತ ಪ್ರದರ್ಶನ ನೀಡಿದ ರವೀಂದರ್ ಸಿಂಗ್ 559 ಅಂಕಗಳೊಂದಿಗೆ ಬೆಳ್ಳಿ ಪದಕವನ್ನು ತಮ್ಮದಾಗಿಸಿಕೊಂಡರು. ರಷ್ಯಾದ ಆಂಟನ್ ಅರಿಸ್ಟಾರ್ಖೋವ್ (561 ಅಂಕ) ಚಿನ್ನದ ಪದಕ ಗೆದ್ದರೆ, ರೊಮೇನಿಯಾದ ಲುಕಾ ಜೋಲ್ಡಿಯಾ (558 ಅಂಕ) ಕಂಚಿನ ಪದಕ ಪಡೆದರು.  ಪ್ರಸ್ತುತ ಪಟ್ಟಿಯಲ್ಲಿ ಭಾರತವು ಒಂದು ಚಿನ್ನ ಹಾಗೂ ಒಂದು ಬೆಳ್ಳಿ ಪದಕದೊಂದಿಗೆ ಅಗ್ರಸ್ಥಾನದಲ್ಲಿದೆ.