ಮೊಹಾಲಿ: ಒಲಿಂಪಿಯನ್ ಬಲ್ಬೀರ್ ಸಿಂಗ್ ಸೀನಿಯರ್ ಇಂಟರ್‌ ನ್ಯಾಷನಲ್ ಹಾಕಿ ಕ್ರೀಡಾಂಗಣದಲ್ಲಿ  ನಡೆದ ಪುರುಷರ ಏಷ್ಯನ್ ಚಾಂಪಿಯನ್ಸ್ ಟ್ರೋಫಿ ಹಾಕಿ ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಭಾರತ ತಂಡ ಜಪಾನ್ ವಿರುದ್ಧ 4-1 ಅಂತರದ ಭರ್ಜರಿ ಜಯ ಸಾಧಿಸಿ, ಸತತ ಮೂರನೇ ಬಾರಿಗೆ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಇಡೀ ಟೂರ್ನಿಯಲ್ಲಿ ಅಜೇಯವಾಗುಳಿದ ಭಾರತ ತಂಡಕ್ಕೆ ಇದು ಒಟ್ಟಾರೆಯಾಗಿ 6ನೇ ಏಷ್ಯನ್ ಚಾಂಪಿಯನ್ಸ್ ಟ್ರೋಫಿ ಶೀರ್ಷಿಕೆಯಾಗಿದೆ. ಈ ಮೊದಲು ಭಾರತ 2011, 2016, 2018, 2023 ಮತ್ತು 2024ರಲ್ಲಿ ಪ್ರಶಸ್ತಿ ಗೆದ್ದುಕೊಂಡಿತ್ತು.ಪಂದ್ಯ ಆರಂಭವಾದ 3ನೇ ನಿಮಿಷದಲ್ಲೇ ಜಪಾನ್‌ನ ಕಾಜುಮಾಸಾ ಮಾತ್ಸುಮೊಟೊ ಅದ್ಭುತ 'ಟೊಮಾಹಾಕ್' ಶಾಟ್ ಮೂಲಕ ಫೀಲ್ಡ್ ಗೋಲ್ ಬಾರಿಸಿ ಭಾರತೀಯ ಅಭಿಮಾನಿಗಳಿಗೆ ಶಾಕ್ ನೀಡಿದರು. ಬಳಿಕ 20ನೇ ನಿಮಿಷದಲ್ಲಿ ಜಪಾನ್‌ಗೆ ಸತತ ಎರಡು ಪೆನಾಲ್ಟಿ ಕಾರ್ನರ್‌ಗಳು ಲಭಿಸಿದರೂ, ಭಾರತೀಯ ರಕ್ಷಣಾ ಪಡೆ ಜಪಾನ್ ನಾಯಕ ರೈಕಿ ಫುಜಿಶಿಮಾ ಅವರ ಗೋಲಿನ ಯತ್ನವನ್ನು ವಿಫಲಗೊಳಿಸಿತು. ಭಾರತದ ಪರ ಜರ್ಮನ್‌ಪ್ರೀತ್ ಸಿಂಗ್ ರಕ್ಷಣಾತ್ಮಕ ಆಟದಲ್ಲಿ ಬಂಡೆಯಂತೆ ನಿಂತರು.ಮೊದಲಾರ್ಧದ ಅಂತ್ಯಕ್ಕೆ 0-1 ಹಿನ್ನಡೆಯಲ್ಲಿದ್ದ ಭಾರತ, ದ್ವಿತೀಯಾರ್ಧದಲ್ಲಿ ಪೂರ್ಣ ಹಿಡಿತ ಸಾಧಿಸಿತು. 33ನೇ ನಿಮಿಷದಲ್ಲಿ ಭಾರತಕ್ಕೆ ಮೊದಲ ಪೆನಾಲ್ಟಿ ಕಾರ್ನರ್ ಸಿಕ್ಕಿತಾದರೂ, ನಾಯಕ ಹರ್ಮನ್‌ಪ್ರೀತ್ ಸಿಂಗ್ ಹೊಡೆದ ಡ್ರ್ಯಾಗ್ ಫ್ಲಿಕ್ ಅನ್ನು ಜಪಾನ್ ಗೋಲ್‌ಕೀಪರ್ ಕಿಶೋ ಕುರೋಡ ತಡೆದರು. ನಂತರ 39ನೇ ನಿಮಿಷದಲ್ಲಿ ಜಪಾನ್ ಪಡೆದ ಪೆನಾಲ್ಟಿ ಕಾರ್ನರ್ ಸಹ ವ್ಯರ್ಥವಾಯಿತು.ಸತತ ದಾಳಿ ಮುಂದುವರಿಸಿದ ಭಾರತ 42ನೇ ನಿಮಿಷದಲ್ಲಿ ಎರಡು ಪೆನಾಲ್ಟಿ ಕಾರ್ನರ್‌ಗಳನ್ನು ಪಡೆಯಿತು. ಆದಿತ್ಯ ಅರ್ಜುನ್ ಲಾಲಾಗೆ ಅವರ ಪಾಸ್ ಆಧಾರಿಸಿ ಶಿಲಾನಂದ್ ಲಾಕ್ರಾ ರಿಬೌಂಡ್‌ನಲ್ಲಿ ಗೋಲ್ ಬಾರಿಸಿ ಪಂದ್ಯವನ್ನು 1-1 ಸಮಬಲಕ್ಕೆ ತಂದರು. ತದನಂತರ 48ನೇ ನಿಮಿಷದಲ್ಲಿ ಹಾರ್ದಿಕ್ ನೀಡಿದ ಅತ್ಯುತ್ತಮ ಪಾಸ್‌ನಿಂದ ದಿಲ್‌ಪ್ರೀತ್ ಸಿಂಗ್ ರಿವರ್ಸ್ ಹಿಟ್ ಮೂಲಕ ಗೋಲು ಬಾರಿಸಿ ಭಾರತಕ್ಕೆ 2-1 ಮುನ್ನಡೆ ತಂದುಕೊಟ್ಟರು.ಇಲ್ಲಿಂದ ಭಾರತೀಯ ಆಟಗಾರರ ವೇಗ ಹಾಗೂ ಆಟದ ಶೈಲಿ ಸಂಪೂರ್ಣ ಬದಲಾಯಿತು. 53ನೇ ನಿಮಿಷದಲ್ಲಿ ಜುಗ್ರಾಜ್ ಸಿಂಗ್ ಪೆನಾಲ್ಟಿ ಕಾರ್ನರ್ ಅನ್ನು ಗೋಲಾಗಿ ಪರಿವರ್ತಿಸಿ ಮುನ್ನಡೆಯನ್ನು 3-1ಕ್ಕೆ ಹೆಚ್ಚಿಸಿದರು. ವಿವೇಕ್ ಸಾಗರ್ ಪ್ರಸಾದ್ ಸರ್ಕಲ್‌ನ ಮೇಲ್ಭಾಗದಿಂದ ಬಾರಿಸಿದ ಭರ್ಜರಿ ಶಾಟ್ ಗೋಲ್ ಪೆಟ್ಟಿಗೆ ಸೇರಿ ಭಾರತಕ್ಕೆ 4-1 ಅಂತರದ ಅಂತಿಮ ಮುನ್ನಡೆ ಒದಗಿಸಿತು. ಪಂದ್ಯ ಮುಗಿಯಲು ಕೆಲವು ಸೆಕೆಂಡುಗಳಿದ್ದಾಗ ಜಪಾನ್‌ಗೆ ಲಭಿಸಿದ 4ನೇ ಪೆನಾಲ್ಟಿ ಕಾರ್ನರ್ ಸಹ ಹೊರಹೋಯಿತು. ಇದರೊಂದಿಗೆ ಭಾರತ ಸಂಭ್ರಮದ ಜಯದೊಂದಿಗೆ ಮತ್ತೊಮ್ಮೆ ಏಷ್ಯಾದ ರಾಜನಾಗಿ ಹೊರಹೊಮ್ಮಿದೆ.