ಮುಂಬೈ: ಭಾರತೀಯ ಷೇರು ಮಾರುಕಟ್ಟೆಯು ಸೋಮವಾರದ ವಹಿವಾಟಿನ ಅಂತ್ಯಕ್ಕೆ ಸಕಾರಾತ್ಮಕವಾಗಿ ಚೇತರಿಸಿಕೊಂಡು ಮುಕ್ತಾಯಗೊಂಡಿತು. ದಿನದ ಅಂತ್ಯಕ್ಕೆ ಸೆನ್ಸೆಕ್ಸ್ 107.25 ಅಂಕ ಅಥವಾ ಶೇಕಡಾ 0.13ರಷ್ಟು ಏರಿಕೆಯೊಂದಿಗೆ 81,106.65 ಕ್ಕೆ ತಲುಪಿದರೆ, ನಿಫ್ಟಿ 58.25 ಅಂಕ ಅಥವಾ ಶೇಕಡಾ 0.23ರಷ್ಟು ಹೆಚ್ಚಳದೊಂದಿಗೆ 25,044.65 ರಲ್ಲಿ ಸ್ಥಿರವಾಯಿತು.ಇಂದಿನ ವಹಿವಾಟಿನಲ್ಲಿ ಮಾರುಕಟ್ಟೆಗೆ ಪ್ರಮುಖವಾಗಿ ಬ್ಯಾಂಕಿಂಗ್ ಷೇರುಗಳು ಬಲ ತುಂಬಿದವು. ನಿಫ್ಟಿ ಬ್ಯಾಂಕ್ ಸೂಚ್ಯಂಕವು ಶೇಕಡಾ 1.51ರಷ್ಟು ಪ್ರಗತಿ ಸಾಧಿಸಿತು. ಇದರೊಂದಿಗೆ ನಿಫ್ಟಿ ಪಿಎಸ್‌ಯು ಬ್ಯಾಂಕ್ (ಶೇ. 3.73), ನಿಫ್ಟಿ ಫಾರ್ಮಾ (ಶೇ. 1.65), ನಿಫ್ಟಿ ಹೆಲ್ತ್‌ಕೇರ್ (ಶೇ. 1.33), ನಿಫ್ಟಿ ಕನ್ಸ್ಯೂಮರ್ ಡ್ಯುರೇಬಲ್ಸ್ (ಶೇ. 0.92), ನಿಫ್ಟಿ ರಿಯಾಲ್ಟಿ (ಶೇ. 0.77), ನಿಫ್ಟಿ ಫೈನಾನ್ಷಿಯಲ್ ಸರ್ವೀಸಸ್ (ಶೇ. 0.75), ನಿಫ್ಟಿ ಪ್ರೈವೇಟ್ ಬ್ಯಾಂಕ್ (ಶೇ. 0.74) ಮತ್ತು ನಿಫ್ಟಿ ಇಂಡಿಯಾ ಡಿಫೆನ್ಸ್ (ಶೇ. 0.55) ವಲಯದ ಷೇರುಗಳು ಲಾಭದೊಂದಿಗೆ ಮುಕ್ತಾಯಗೊಂಡವು.ಮತ್ತೊಂದೆಡೆ, ನಿಫ್ಟಿ ಐಟಿ (-1.22%), ನಿಫ್ಟಿ ಮೆಟಲ್ (-0.46%), ನಿಫ್ಟಿ ಎಫ್‌ಎಂಸಿಜಿ (-0.15%), ನಿಫ್ಟಿ ಕಮೋಡಿಟೀಸ್ (-0.13%) ಮತ್ತು ನಿಫ್ಟಿ ಸರ್ವೀಸಸ್ (-0.05%) ಕುಸಿತವನ್ನುಕಂಡವು. ಮಿಡ್‌ಕ್ಯಾಪ್ ಮತ್ತು ಸ್ಮಾಲ್‌ಕ್ಯಾಪ್ ಷೇರುಗಳಲ್ಲೂ ಖರೀದಿ ಕಂಡುಬಂದಿತು; ನಿಫ್ಟಿ ಮಿಡ್‌ಕ್ಯಾಪ್ 100 ಸೂಚ್ಯಂಕವು 334.40 ಅಂಕ ಅಂದರೆ ಶೇಕಡಾ 0.55ರಷ್ಟು ಜಿಗಿತ ಕಂಡು 61,022.55 ಕ್ಕೆ ತಲುಪಿದರೆ, ನಿಫ್ಟಿ ಸ್ಮಾಲ್‌ಕ್ಯಾಪ್ 100 ಸೂಚ್ಯಂಕವು 18.65 ಅಂಕಗಳ (ಶೇ. 0.10) ಏರಿಕೆಯೊಂದಿಗೆ 19,185.05 ರಲ್ಲಿ ಅಂತ್ಯಗೊಂಡಿತು.ಪ್ರಮುಖ ಲಾಭ ಹಾಗೂ ನಷ್ಟ ದಾಖಲಿಸಿದ ಕಂಪನಿಗಳು:ಸೆನ್ಸೆಕ್ಸ್ ವಲಯದಲ್ಲಿ ಎಸ್‌ಬಿಐ, ಟ್ರೆಂಟ್, ಎಲ್‌ ಆಂಡ್‌ ಟಿ, ಎನ್‌ಟಿಪಿಸಿ, ಎಚ್‌ಡಿಎಫ್‌ಸಿ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್, ಮಾರುತಿ ಸುಜುಕಿ, ಎಂ ಆಂಡ್‌ ಎಂ, ಟೈಟಾನ್ ಮತ್ತು ಇಂಟರ್‌ಗ್ಲೋಬ್ ಏವಿಯೇಷನ್ ಕಂಪನಿಗಳ ಷೇರುಗಳು ಲಾಭ ಗಳಿಸಿದವು. ಇದಕ್ಕೆ ವಿರುದ್ಧವಾಗಿ, ಎಚ್‌ಸಿಎಲ್ ಟೆಕ್, ಟಾಟಾ ಸ್ಟೀಲ್, ಅಲ್ಟ್ರಾಟೆಕ್ ಸಿಮೆಂಟ್, ಬಜಾಜ್ ಫೈನಾನ್ಸ್, ಟೆಕ್ ಮಹೀಂದ್ರಾ, ಐಟಿಸಿ, ಇನ್ಫೋಸಿಸ್, ಏಷ್ಯನ್ ಪೇಂಟ್ಸ್, ಪವರ್ ಗ್ರಿಡ್, ಬಜಾಜ್ ಫಿನ್‌ಸರ್ವ್, ಟಿಸಿಎಸ್, ಭಾರತಿ ಏರ್‌ಟೆಲ್, ಬಿಇಎಲ್ ಮತ್ತು ಸನ್ ಫಾರ್ಮಾ ಷೇರುಗಳು ನಷ್ಟವನ್ನು ಅನುಭವಿಸಿದವು.