ಅನ್ನದಾತರ ಜೊತೆ ಸರ್ಕಾರ ಚೆಲ್ಲಾಟವಾಡುತ್ತಿದೆ : ಬಿ.ವೈ.ವಿಜಯೇಂದ್ರ ಕಿಡಿ

ಬೆಂಗಳೂರು :  ಬರದಿಂದ ತತ್ತರಿಸಿರುವ ನಾಡಿನ ಅನ್ನದಾತರಿಗೆ ಸಾಂತ್ವನ ಹೇಳಬೇಕಾದ ರಾಜ್ಯ ಕಾಂಗ್ರೆಸ್ ಸರ್ಕಾರ, ಕಿಂಚಿತ್ ಮಾನವೀಯತೆಯೂ ಇಲ್ಲದೆ ಅವರ ಸಂಕಷ್ಟದ ಜೊತೆ ಚೆಲ್ಲಾಟವಾಡುತ್ತಿರುವುದು ಖಂಡನೀಯ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ.ವಿಜಯೇಂದ್ರ ಕಿಡಿಕಾರಿದ್ದಾರೆ. ಎಕ್ಸ್‌ ಖಾತೆಯಲ್ಲಿ  ಪತ್ರಿಕೆಯೊಂದರ ತುಣುಕನ್ನು ಹಂಚಿಕೊಂಡಿರುವ ಅವರು ತೀವ್ರ ಬರಪೀಡಿತ ಯಾದಗಿರಿ ಸೇರಿದಂತೆ ರಾಜ್ಯದ ರೈತರಿಗೆ 5,000 ರೂ, ನೀಡುವುದಾಗಿ ಆಶ್ವಾಸನೆ ನೀಡಿ, ಮೊದಲ ಕಂತಿನಲ್ಲಿ 2,500 ರೂ. ಜಮೆ ಮಾಡುವುದಾಗಿ ಸ್ವತಃ ಮುಖ್ಯಮಂತ್ರಿ ಶ್ರೀ ಡಿಕೆ ಶಿವಕುಮಾರ್ ರವರೇ ಮಾತು ಕೊಟ್ಟಿದ್ದರು. ಆದರೆ, ರೈತರ ಬ್ಯಾಂಕ್ ಖಾತೆಗಳಿಗೆ 1,500 ರೂ. 2,000 ರೂ. ಹೀಗೆ ನೀಡಿರುವುದು ಈ ದಿವಾಳಿ ಸರ್ಕಾರದ ಬೇಜವಾಬ್ದಾರಿ, ಗೊಂದಲಕಾರಿ ನಿರ್ಣಯಗಳು ಹಾಗೂ ರೈತವಿರೋಧಿ ಧೋರಣೆಗೆ ನಿದರ್ಶನ.  ಸಾಲದ ಸುಳಿಯಲ್ಲಿ ಸಿಲುಕಿರುವ, ಬೆಳೆ ಕಳೆದುಕೊಂಡಿರುವ ರೈತರಿಗೆ ಸರ್ಕಾರ ನೀಡುವ ಪರಿಹಾರ ಭಿಕ್ಷೆಯಲ್ಲ, ಅದು ರೈತರ ಹಕ್ಕು. ಖಜಾನೆ ಖಾಲಿ ಮಾಡಿಕೊಂಡಿರುವ ರಾಜ್ಯ ಸರ್ಕಾರ ರೈತರಿಗೆ ಘೋಷಿಸಿದ್ದೇ ಅತ್ಯಂತ ಅಲ್ಪ ಪ್ರಮಾಣದ ನೆರವು. ಘೋಷಿಸಿದ್ದಷ್ಟನ್ನೂ ಪೂರ್ಣ ಪ್ರಮಾಣದಲ್ಲಿ ತಲುಪಿಸಲಾಗದ ಈ ಕಾಂಗ್ರೆಸ್ ಸರ್ಕಾರದ ನಡೆ, ರೈತರ ಕಣ್ಣೀರನ್ನು, ಸಂಕಷ್ಟಗಳನ್ನು ಅಪಹಾಸ್ಯ ಮಾಡುವಂತಿದೆ ಎಂದಿದ್ದಾರೆ. ಮಾನ್ಯ ಮುಖ್ಯಮಂತ್ರಿಗಳೇ, ಮಾತು ತಪ್ಪಿ ರೈತರ ನಿರೀಕ್ಷೆಗೆ ತಣ್ಣೀರೆರಚುತ್ತಿರುವ ನಿಮ್ಮ ಸರ್ಕಾರ, ಮೊದಲು ಇತರ ಎಲ್ಲಾ ಕೆಲಸ ಬದಿಗೊತ್ತಿ ನೀವು ನುಡಿದಂತೇ ನಡೆಯಿರಿ! ತಕ್ಷಣವೇ, ಎಲ್ಲ ಬರಪೀಡಿತ ರೈತರಿಗೆ ಬಾಕಿ ಹಣ ಸೇರಿ ಪೂರ್ಣ 5000 ರೂ. ಪರಿಹಾರವನ್ನು ಬಿಡುಗಡೆ ಮಾಡಿ, ಅನ್ನದಾತರ ಕಣ್ಣೀರಿನ ಶಾಪಕ್ಕೆ ಅವಕಾಶ ಕೊಡಬೇಡಿ ಎಂದಿದ್ದಾರೆ.